ცნობილი გახდა 2026 წლის მსოფლიო ნაკრების გამოკითხვის შედეგები, რომელშიც მონაწილეობა 19 ათასზე მეტმა მოთამაშემ მიიღო.
საუკეთესო თერთმეტეულში მოსახვედრად საქართველოს ნაკრების ლიდერი, ხვიჩა კვარაცხელიაც იბრძოდა და თავდამსხმელთა შორის მე-7 ადგილი დაიკავა.
ქართველმა შემტევმა ხმების 14.4% დააგროვა და უკან მოიტოვა ისეთი ვარსკვლავები, როგორებიც არიან კრიშტიანუ რონალდუ, უსმან დემბელე და რაფინია. მსოფლიო ნაკრებში ფორვარდებისთვის სულ 4 ადგილი იყო გამოყოფილი, რომელიც კილიან მბაპემ (46.0%), ლამინ იამალმა (37.4%), ლიონელ მესიმ (29.5%) და ერლინგ ჰოლანდმა (28.4%) გაინაწილეს.
გამოკითხვაში დაფიქსირდა ისტორიული მოვლენაც - ფეხბურთის ისტორიაში პირველად მოხდა, როცა მიმდინარე წლის ოქროს ბურთის გამარჯვებული მსოფლიო ნაკრებში ვერ მოხვდა. ჰარი კეინმა ხმების 27.6%-ით მე-5 ადგილი დაიკავა, ხოლო მე-6 პოზიციაზე 15.6%-ით მაიკლ ოლისე გავიდა.
ლიონელ მესი 2023 წლის შემდეგ პირველად დაბრუნდა წლის სიმბოლურ ნაკრებში და საკუთარი რეკორდი გააუმჯობესა, არგენტინელი ფეხბურთელი საუკეთესო თერთმეტეულში უკვე მე-18-ედ მოხვდა. მესი სიმბოლურ ნაკრებში პირველად 2007 წელს შეიყვანეს.
ლამინ იამალი, რომელიც გასული წლის სიმბოლურ ნაკრებშიც მოხვდა, ისტორიაში პირველი ფეხბურთელი გახდა, რომელმაც 20 წლის ასაკამდე FIFPRO-ს წლის საუკეთესო თერთმეტეულში 2-ჯერ მოხვედრა შეძლო.
იამალი შეუერთდა 2026 წლის მსოფლიო ჩემპიონატის გამარჯვებულებს, დავიდ რაიას, პაუ კუბარსისა და როდრის. მათი წყალობით ესპანელი ფეხბურთელების FIFPRO-ს სიმბოლურ ნაკრებში მოხვედრის საერთო რაოდენობა რეკორდულ 53-მდე გაიზარდა.
FIFPRO-ს 2026 წლის სიმბოლური ნაკრები
მეკარე - დავიდ რაია (არსენალი, ესპანეთი)
მცველები - პაუ კუბარსი (ბარსელონა, ესპანეთი), აშრაფ ჰაკიმი (პარი სენ-ჟერმენი, მაროკო), ნუნუ მენდეში (პარი სენ-ჟერმენი, პორტუგალია)
ნახევარმცველები - ჯუდ ბელინგემი (რეალი, ინგლისი), როდრი (მანჩესტერ სიტი/ბარსელონა, ესპანეთი), ვიტინია (პარი სენ-ჟერმენი, პორტუგალია)
თავდამსხმელები - ერლინგ ჰალანდი (მანჩესტერ სიტი, ნორვეგია), კილიან მბაპე (რეალი, საფრანგეთი), ლიონელ მესი (ინტერ მაიამი, არგენტინა), ლამინ იამალი (ბარსელონა, ესპანეთი)
როგორ ჩატარდა ხმის მიცემა?
პროფესიონალმა ფეხბურთელებმა საკუთარი არჩევანი FIFPRO-სა და მასთან დაკავშირებული ფეხბურთელთა პროფკავშირების მიერ შექმნილი დაცული ციფრული პლატფორმის საშუალებით დააფიქსირეს.
მამაკაცთა სიმბოლური ნაკრების შერჩევისას გათვალისწინებული იყო ფეხბურთელების გამოსვლა 2025 წლის 4 აგვისტოდან 2026 წლის 19 ივლისის ჩათვლით.
კანდიდატს აღნიშნულ პერიოდში მინიმუმ 30 ოფიციალური შეხვედრა უნდა ჰქონოდა ჩატარებული.
თითოეული მონაწილე 4 პოზიციაზე - მეკარე, მცველი, ნახევარმცველი და თავდამსხმელი - 3-3 საუკეთესო ფეხბურთელს ირჩევდა.
სიმბოლურ ნაკრებში ავტომატურად ხვდებოდნენ ყველაზე მეტი ხმის მქონე მეკარე, 3 მცველი, 3 ნახევარმცველი და 3 თავდამსხმელი.
მე-11 ადგილი კი იმ დარჩენილ მოედნის მოთამაშეს ერგებოდა, რომელსაც ყველაზე მეტი ხმა ჰქონდა მიღებული.
ვინ მიიღო ყველაზე მეტი ხმა?
ყველაზე მეტი ხმა არსენალის მეკარე დავიდ რაიამ მიიღო - 10 278, რაც გამოკითხვის მონაწილეთა 52%-ს შეადგენს.
მოედნის მოთამაშეებს შორის საუკეთესო შედეგი კილიან მბაპემ დააფიქსირა. ფრანგმა თავდამსხმელმა 9 105 ხმა მიიღო, რაც საერთო რაოდენობის 46%-ია.
ვინ მოხვდა სიმბოლურ ნაკრებში პირველად?
2026 წელს FIFPRO-ს მამაკაცთა სიმბოლურ ნაკრებში 2 დებიუტანტი მოხვდა - დავიდ რაია და პაუ კუბარსი.
რომელ ქვეყანას აქვს ყველაზე მეტი წარმომადგენლობა სიმბოლურ ნაკრებში?
რეკორდი ესპანეთს ეკუთვნის. ქვეყნის 17 სხვადასხვა ფეხბურთელი FIFPRO-ს მამაკაცთა წლის სიმბოლურ ნაკრებში ჯამში 53-ჯერ მოხვდა.
2026 წელს ამ სიას პირველად შეუერთდნენ დავიდ რაია და პაუ კუბარსი, რომლებმაც ესპანეთის რეკორდული მაჩვენებელი კიდევ უფრო გააუმჯობესეს.
