უეფას ჩემპიონთა ლიგის პლეიოფის მატჩის შემდეგ, ტიერი ანრიმ ფეხბურთში რასიზმთან დაკავშრებულ პრობლემასა და ვინისიუს ჟუნიორისა და ჯანლუკა პრესტიანის ინციდენტთან დაკავშირებით ისაუბრა.
„მე კარგად მესმის, რას გადის ვინი ჟუნიორი. ეს იმდენჯერ მომხდარა ჩემთან და თამაშების შემდეგ იმდენჯერ მისაუბრია ამაზე. როცა ეს ჩემთან ხდებოდა, მაბრალებდნენ, თითქოს თამაშის შემდეგ გამართლებას ვეძებდი.
ზოგჯერ თავს მარტოდ გრძნობ, რადგან შენი სიტყვაა მის სიტყვასთან წინააღმდეგობაში. და რადგან არ ვიცით, რა თქვა პრესტიანიმ, რადგან ის ძალიან ‘გამბედავი’ იყო და მაისური პირზე აიფარა, რომ არ დაგვენახა რას ამბობდა, უკვე საეჭვოდ გამოიყურება, რადგან არ გინდოდა ხალხს ენახა ან წაეკითხა, რას ამბობდი.
შემდეგ ვინი ჯუნიორის რეაქცია მეუბნება, რომ რაღაც არასწორი მოხდა.
ვინის შეუძლია თავისი ვერსია მოგვიყვეს, ხოლო დარწმუნებული ვარ, პრესტიანი არ გვეტყვის, სინამდვილეში რა თქვა, რადგან დავინახე, როგორ დაუპირისპირდა მას მბაპე და კილიანს უთხრა: ‘არაფერი მითქვამს’. აბა, სულ მცირე რაღაც ხომ მაინც უნდა გეთქვა.
ზოგჯერ თავს მარტოდ გრძნობ და აღარ იცი, რა უნდა გააკეთო, რადგან მეც ვყოფილვარ ამ სიტუაციაში, ვინიც ყოფილა და ბევრი სხვა ფეხბურთელიც. 2026 წელია და მაინც, ასეთი თამაშის შემდეგ, როცა უნდა ვსაუბრობდეთ მის ბრწყინვალე გოლზე…
არ უნდა გიწევდეს იმის ატანა, რომ მსაჯი გეუბნება კუთხურის ალამთან არ მიხვიდე, რადგან ეს ბრბოს გააღიზიანებს… ეს კუთხურია! კუთხურს ვერ გავათამაშებ? იქ ვერ მივალ კუთხურის ჩასაწოდებლად მხოლოდ იმიტომ, რომ ვიღაცები რაღაცებს ფიქრობენ? რას ნიშნავს, რომ კუთხურს ვერ გავათამაშებ?
მე მესმის ეს ყველაფერი და გარწმუნებთ, როცა ასე ხდება, აღარ იცი რა გააკეთო. ერთხელ გასვლას ცდილობდა, სხვა დროს ვიღაცისთვის დარტყმას, რადგან მოთმინება დაეკარგა, ახლა კი მსაჯთან მივიდა, რომ ეთქვა, რა მოხდა.
მე ეს გამომივლია, მსაჯმაც მითხრა, რომ ვერაფერს გააკეთებდა, და როგორც ხედავთ, ვერაფერი გააკეთეს.
ვნახოთ, რამდენად დიდი კაცია პრესტიანი, გვითხრას, რა თქვა. რაღაც მაინც უნდა გეთქვა, რადგან ვერ წახვალ და მბაპეს ეტყვი: ‘არაფერი მითქვამს’. რას ნიშნავს, არაფერი არ მითქვამს? მაშინ პირზე რატომ იფარებდი - გაციებული იყავი?“ - განაცხადა ფრანგმა CBS Sports-ის ეთერში.
მბაპე: „მე მოგიყვებით სრულ ისტორიას იმის შესახებ, რაც მოხდა"
