ესპანეთის ნაკრების შემტევმა, ნიკო უილიამსმა, სოციალურ ქსელში პოსტი გამოაქვეყნა.
„დღეს ჩემს ცხოვრებაში ერთ-ერთი ყველაზე მძიმე დღეა. კვლავ ტრავმა მივიღე ძალიან რთული წლის შემდეგ, რომელშიც ტკივილმა ჩემთან ბრძოლა მოიგო, მაგრამ ომი ვერ მოიგო.
მისი დაძლევა შევძელი მძიმე შრომით, თავგანწირვით და, უპირველეს ყოვლისა, პასუხისმგებლობით.
ეს იყო ტანჯვის, სევდის, გაურკვევლობისა და შფოთვის წელიწადნახევრიანი პერიოდი. არ ვიცოდი, როდის შევძლებდი კვლავ ტკივილის გარეშე თამაშს ან როდის დავუბრუნდებოდი ნორმალურ ცხოვრებას.
იქამდეც კი მივედი, რომ ტკივილით ვცხოვრობდი ისეთ მარტივ ყოველდღიურ მოქმედებებში, როგორიცაა საპირფარეშოში წასვლა, მანქანაში ჩაჯდომა-გადმოსვლა ან უბრალოდ ყოველდღიური ცხოვრებით ტკბობა.
ჩემი მთავარი მიზანი იყო, ფეხბურთის თამაშისას ისევ ბედნიერი ვყოფილიყავი და ღიმილი დამებრუნებინა. რადგან ღიმილის, სიამოვნებისა და ბედნიერების გარეშე უმაღლეს დონეზე თამაში არ შემიძლია.
ეს ყველაფერი დავძლიე. შემდეგ ბარძაყის უკანა კუნთის ტრავმა მივიღე, რომელმაც კიდევ ერთხელ გამომცადა. ისევ დავკარგე ღიმილი, მაგრამ არც ამის უფლება მივეცი, რომ შევეჩერებინე.
გუშინ კიდევ ერთი ტრავმა მივიღე ეპიზოდში, სადაც ჩემმა კოლეგამ პროფესიონალმა ფეხბურთელმა იმედგაცრუებისა, უკმაყოფილებისა და საკუთარი მდგომარეობით გამოწვეული სევდის ფონზე იმოქმედა.
ჩემი აზრით, ეს ეპიზოდი სრულიად თავიდან ასაცილებელი იყო, რადგან საერთოდ არ იყო საჭირო.
მაგრამ ესეც ვერ შემაჩერებს. ვიცი, რომ ღმერთს ჩემთვის საკუთარი გეგმა აქვს და ბოლო წამამდე ვიბრძოლებ, რათა დავუბრუნდე იმას, რაც ყველაზე მეტად მიყვარს - ფეხბურთის თამაშს, ბედნიერებას და უამრავი ადამიანისთვის სიხარულის მინიჭებას.
მთელი გულით მადლობას გიხდით მხარდაჭერის ყველა შეტყობინებისთვის.
ეს ისტორია ჯერ არ დასრულებულა - ამ მსოფლიო ჩემპიონატზე ძალიან მალე კვლავ შევხვდებით ერთმანეთს.“ - წერს ნიკო.
ატლეტიკის ფეხბურთელმა დაზიანება ურუგვაისთან 1-0 მოგებულ მატჩში მიიღო, რომლითაც ესპანეთმა ჯგუფში პირველი ადგილი დაიკავა.
