სავარაუდოდ, პინო მუნდიალს გამოეთიშა, ნიკოს ტრავმის გამოც შეშფოთებაა

ესპანეთის ნაკრების ვინგერს, იერემი პინოს, მსოფლიოს ჩემპიონატის დარჩენილი ნაწილის გამოტოვების საფრთხე ემუქრება, ხოლო ნიკო უილიამსის ტრავმის გამოც სერიოზული შეშფოთებაა.

პინომ და უილიამსმა დაზიანებები ურუგვაისთან 1:0 მოგებულ მატჩში მიიღეს. ორივე ფეხბურთელი მეორე ტაიმში შევიდა მოედანზე. პინომ ლავიწის ძვალი დაიზიანა, ხოლო უილიამსს საზარდულის პრობლემა შეექმნა.

პინომ შესაძლოა მსოფლიოს ჩემპიონატის დარჩენილი ნაწილი გამოტოვოს.

„მას ლავიწის ძვლის ტრავმა აქვს. დამატებით კვლევებს ხვალ ჩავუტარებთ.

ის ძლიერ ტკივილს განიცდიდა და ფაქტობრივად გმირობა იყო, რომ თამაშის ბოლომდე დაგვეხმარა.“ - განაცხადა ესპანეთის მთავარმა მწვრთნელმა ლუის დე ლა ფუენტემ მატჩის შემდეგ გამართულ პრესკონფერენციაზე.

კრისტალ პალასის ფეხბურთელი პინო და ბილბაოს ატლეტიკის შემტევი უილიამსი სრულ სამედიცინო გამოკვლევებს გაივლიან, რის შემდეგაც გაირკვევა მათი ტრავმების სიმძიმე.

ესპანეთის ნაკრებთან დაახლოებული წყაროების ინფორმაციით, არსებობს შიში, რომ ორივე ფეხბურთელმა შესაძლოა ტურნირის დარჩენილი ნაწილი გამოტოვოს.

თუ ერთ-ერთი ან ორივე მათგანი მსოფლიოს ჩემპიონატს გამოეთიშება, ესპანეთი მათ შემცვლელებს ვეღარ გამოიძახებს.

FIFA-ს რეგლამენტის მიხედვით, განაცხადში ცვლილებების შეტანის ვადა გუნდის პირველი მატჩის დაწყებამდე 24 საათით ადრე იწურება.

ურუგვაისთან გამარჯვების შემდეგ ესპანეთმა ჯგუფ H-ში პირველი ადგილი დაიკავა და პლეი-ოფის საგზური მოიპოვა.

მერვედფინალში ესპანეთის მეტოქე ჯგუფ J-ის მეორეადგილოსანი - ავსტრია ან ალჟირი - იქნება.