ჟურნალისტი ჯეკ როსერის ინფორმაციით, ვესტ ჰემ იუნაიტედის ხელმძღვანელობაში აზრები ორად გაიყო იმის შესახებ, უნდა დაეტოვებინათ თუ არა პორტუგალიელი სპეციალისტი ნუნუ ეშპირიტუ სანტუ გუნდის მთავარ მწვრთნელად. საბოლოოდ გადაწყდა, რომ ის ლონდონ სტადიუმზე რჩება.
ლონდონელებს საშინელი სეზონი ჰქონდათ. მათ მხოლოდ 10 მატჩი მოიგეს, 9 ფრე ითამაშეს, 19-ჯერ წააგეს და ჩემპიონატის ბოლო ტურში ოფიციალურად გავარდნენ პრემიერ ლიგიდან ჩემპიონშიფში. კლუბმა ჯერ კიდევ სექტემბერში, არადამაკმაყოფილებელი შედეგების გამო, გრემ პოტერი გაათავისუფლა და მის ადგილას ნუნუ დანიშნა, რათა გუნდს უმაღლეს ლიგაში ადგილი შეენარჩუნებინა, მაგრამ პორტუგალიელმა მისია ვერ შეასრულა.
იანვარში, როდესაც ვესტ ჰემი გასავარდნ ზონაში იყო ჩარჩენილი, ხმები დადიოდა, რომ ნუნუს გაგდებას აპირებდნენ, თუმცა მან პოსტი სეზონის ბოლომდე შეინარჩუნა. გუნდის გავარდნის შემდეგ მისი მომავალი კიდევ უფრო ბუნდოვანი გახდა. ბევრი ფიქრობდა, რომ მას ან გაათავისუფლებდნენ, ან თავადვე წავიდოდა. კლუბმა კი ოფიციალური განცხადება გაავრცელა, სადაც დაადასტურა, რომ ნუნუ მომავალ სეზონშიც უხელმძღვანელებს გუნდს და მას ჩემპიონშიფიდან ამოსვლის საქმეში სრულ ნდობას უცხადებენ.
ოფიციალურად: ნუნუ ესპირიტუ სანტუ ვესტ ჰემში რჩება!
მიუხედავად იმისა, რომ ბორდში აზრთა სხვადასხვაობა იყო, პორტუგალიელი მაინც დარჩა, თუმცა მომავალი სეზონის ცუდად დაწყების შემთხვევაში მასზე წნეხი საგრძნობლად გაიზრდება.
სანტუმ ჯერ კიდევ არ იცის, თუ როგორი შემადგენლობა ეყოლება, სანამ სექტემბრის დასაწყისში სატრანსფერო ფანჯარა არ დაიხურება. გავარდნის შემდეგ ბევრ ვარსკვლავურ ფეხბურთელს სხვაგან გადასვლა უნდა და ჯერ უცნობია, ვის შენარჩუნებას შეძლებს კლუბი.
მაგალითად, კრისენსიო სამერვილი უკვე არაერთი გუნდის სამიზნეა. ვესტ ჰემს ფეხბურთელების გაყიდვით ფულის შოვნაც სჭირდება, ასე რომ, ნუნუს, სავარაუდოდ, იმ მოთამაშეებთან გამოშვიდობება მოუწევს, რომელთა დატოვებაც ძალიან უნდოდა. ამავდროულად, მას ახალი კადრების დამატებაც დასჭირდება, თუმცა საკითხავია, რა თანხას გამოყოფს კლუბის ხელმძღვანელობა ტრანსფერებისთვის.
