ოქროს ბურთის კრიტერიუმების კრიტიკა - რა არის მთავარი ჯილდოსთვის?

ოქროს ბურთის დაჯილდოების წინ საფეხბურთო სამყაროში ახალი დებატები დაიწყო, რომელსაც საფუძველი ბარსელონას ახალგაზრდა ვარსკვლავმა, ლამინ იამალმა ჩაუყარა.

ესპანელის აზრით, ჯილდო უნდა გადაეცეს მოთამაშეს, რომელსაც მოედანზე ყველაზე დიდი გავლენა აქვს და არა აუცილებლად მას, ვინც 80 გოლს იტანს ან ბევრ ტიტულს იგებს.

ამ ხედვას ეწინააღმდეგება კილიან მბაპეს პოზიცია. ფრანგი მიიჩნევს, რომ ინდივიდუალური ჯილდო და გოლების/ტიტულების სტატისტიკა ერთმანეთს არ გამორიცხავს. მისი აზრით, მოთამაშე, რომელიც მუნდიალის ბომბარდირი ხდება (10 გოლით) და ბომბარდირობას არც ლა ლიგასა და ჩემპიონთა ლიგაზე თმობს, პირდაპირ უნდა იყოს ოქროს ბურთის მთავარი პრეტენდენტი.

რაფინია და იამალი - მთავარი პარადოქსი

ამ დებატების იდეალური მაგალითი ბარსელონასა და სევილიას (3:1) ბოლო მატჩი გამოდგა. შეხვედრის საუკეთესო მოთამაშედ გულშემატკივართა 92.5%-მა ჰეთ-თრიკის ავტორი რაფინია დაასახელა. თუმცა, აღსანიშნავია, რომ სამიდან ორი გოლი სწორედ ლამინ იამალის ბრწყინვალე მოქმედებებს მოჰყვა. იამალმა 2 ასისტი შეასრულა, 6 საკვანძო პასი გააკეთა და მატჩის მთავარი შემოქმედი იყო. მიუხედავად ამისა, ხალხმა მაინც ის მოთამაშე აირჩია, რომელმაც ბოლო, გადამწყვეტი შეხება შეასრულა.

როგორ წყდება ოქროს ბურთის ბედი?

ოქროს ბურთის ოფიციალური წესების მიხედვით, მთავარი კრიტერიუმი მოთამაშის ინდივიდუალური პერფორმანსი და მატჩზე მისი გავლენაა. გოლები და ტიტულები მხოლოდ ამის შემდეგ მოდის. ჯილდოს ბედს არა ხალხი, არამედ მსოფლიოს 100 წამყვანი ქვეყნის 100 ჟურნალისტი წყვეტს.

საბოლოოდ, მთავარი კითხვა უცვლელი რჩება - ვინ არის საუკეთესო ფეხბურთელი: ის, ვისაც გოლი გააქვს, თუ ის, ვინც ამ გოლის გატანას შესაძლებელს ხდის? ამას ჟურნალისტების არჩევანი გვიჩვენებს.