ფერარიმ ლეკლერთან ახალი კონტრაქტი გააფორმა

სკუდერია ფერარიმ შარლ ლეკლერთან კონტრაქტის გახანგრძლივება გამოაცხადა.

მონეგასკი მრბოლელი ფორმულა 1-ის მსოფლიო ჩემპიონატზე გუნდის ფერებს მომდევნო სეზონებშიც დაიცავს.

ერთად ზრდის გზა

შარლსა და ფერარის შორის კავშირი ფორმულა 1-ში მისი დებიუტის დაწყებამდე დიდი ხნით ადრე დაიწყო.

მას შემდეგ, რაც 2016 წელს ფერარის მრბოლელთა აკადემიას შეუერთდა, სკუდერია ყოველთვის მისი კარიერის ცენტრალური ნაწილი იყო - ფორმულა 2-ის ჩემპიონობის მოპოვებიდან 2017 წელს, ფორმულა 1-ში დებიუტამდე მომდევნო სეზონში, ხოლო 2019 წლიდან უკვე სკუდერია ფერარის ოფიციალურ მრბოლელად.

მას შემდეგ შარლი გუნდის ერთ-ერთ უმნიშვნელოვანეს ფიგურად იქცა, რომელიც გამოირჩევა სისწრაფით, ნიჭითა და შეუპოვარი საბრძოლო სულისკვეთებით. წლების განმავლობაში მან ფერარის გულშემატკივრებს დაუვიწყარი გამარჯვებები, პოლ-პოზიციები და პოდიუმები აჩუქა და სკუდერიას ისტორიის სულ უფრო მნიშვნელოვანი ნაწილი გახდა.

28 წლის ასაკში ის უკვე ფერარის ისტორიაში ფორმულა 1-ის მეორე ყველაზე მრავალგზის მონაწილე მრბოლელია და პოულ პოზიციების რაოდენობითაც მეორე ადგილზეა და მხოლოდ მიხაელ შუმახერს ჩამორჩება.

„ვერ ვიქნებოდი უფრო ბედნიერი, რომ ამ მოგზაურობას სკუდერია ფერარისთან ერთად ვაგრძელებ. ეს გუნდი ჩემთვის ყოველთვის ბევრად მეტი იყო, ვიდრე უბრალოდ გუნდი. ეს არის გუნდი, რომელშიც ბავშვობიდანვე ვოცნებობდი ყოფნას, და ამ წლების განმავლობაში ის ჩემს მეორე ოჯახად იქცა.

ერთად გადავიტანეთ როგორც დაუვიწყარი წარმატებები, ისე რთული პერიოდები, მაგრამ მე ამ გუნდის უფრო მეტად მჯერა, ვიდრე ოდესმე, და გულწრფელად მადლიერი ვარ, რომ საერთო მიზნის - მსოფლიო ჩემპიონატის მარანელოში დაბრუნების - მისაღწევად კვლავ გვერდიგვერდ ვიბრძოლებთ.

ფერარის მრბოლელობა ოცნების ახდენაა, მაგრამ ამავდროულად ეს უდიდესი პასუხისმგებლობაცაა, რომელსაც არასდროს ვიღებ როგორც მოცემულობას.

გავაგრძელებ ყველაფრის გაღებას, რაც შემიძლია, რათა ეს გუნდი იქ დავაბრუნოთ, სადაც მისი ადგილია - მწვერვალზე.

ამას გავაკეთებ ყველასთვის მარანელოში და, უპირველეს ყოვლისა, ტიფოზებისთვის, რომელთა ვნება და სიყვარული სკუდერიას გულისცემაა.“ - განაცხადა მონეგასკმა.