უეფას ერთა ლიგის მე-5 ტურში, A დივიზიონის მატჩში პორტუგალიის ნაკრებმა დრაგაუზე პოლონეთი მიიღო.
შეხვედრის პირველი ტაიმი უგოლოდ დასრულდა, აი მეორე ტაიმი კი რადიკალურად განსხვავებულად წარიმართა და საბოლოო ჯამში 6 გოლი ვიხილეთ.
59-ე წუთზე ანგარიში ნუნუ მენდეშის საჯარიმოში ჩაწოდების შემდეგ რაფა ლეაუმ გახსნა. 72-ე წუთზე პოლონელთა კარში პენალტი დაინიშნა, რომელიც კრიშტიანუ რონალდუმ შეასრულა ზუსტად და სხვაობა ორამდე გაზარდა.
მე-80 წუთზე თავი ბრუნო ფერნანდეშმა გამოიჩინა, რომელსაც პასი ვიტინიამ გაუკეთა. აქედან 3 წუთში კი ანგარიში 4-0 პედრუ ნეტუმ გახადა, რონალდუმ ამჯერად საგოლე გადაცემა მიითვალა.
87-ე წუთზე კრიშტიანუმ უკვე დუბლი შეასრულა. 39 წლის ლეგენდამ ვიტინიას ჩაწოდების შემდეგ აკრობატული დარტყმით მოახერხა გოლის გატანა. ეს რონალდუს კარიერაში 910-ე გოლია.
ვიდეო: რონალდუს მაკრატელა - 910-ე გოლი კარიერაში
88-ე წუთზე პოლონელთა მხრიდან პრესტიჟის გოლი დომინიკ მარჩუკმა გაიტანა და საბოლოო ანგარიში 5-1 დააფიქსირა.
ჯგუფის მეორე მატჩში შოტლანდიამ ჯონ მაკგინის გოლით ხორვატია 1-0 დაამარცხა.
ბოლო ტურის წინ პორტუგალიელებმა 13 ქულა დააგროვეს და ჯგუფში პირველობა გაინაღდეს, შესაბამისად ისინი ერთა ლიგის პლეიოფში ითამაშებენ. ხორვატია მე-2 ადგილზე 7 ქულითაა, პოლონეთსა და შოტლანდიას კი 4-4 ქულა აქვთ.
ბოლო ტურში ხორვატია პორტუგალიას მიიღებს, პოლონეთი კი შოტლანდიას.
ესპანეთმა დანიაში მოიგო და ჯგუფის გამარჯვებული გახდა
