სალიბამ შესაძლოა მსოფლიო ჩემპიონატი გამოტოვოს

უილიამ სალიბამ უეფას ჩემპიონთა ლიგის ფინალში სრული 120 წუთი ითამაშა, სადაც არსენალი მოქმედ ჩემპიონ პარი სენ-ჟერმენთან პენალტების სერიაში დამარცხდა.

Foot Mercato-ს ინფორმაციით, ფრანგი მცველი მატჩამდე მცირე ტრავმით თამაშობდა, რომელიც ბუდაპეშტში გამართული შეხვედრის განმავლობაში გამწვავდა.

გამოცემის ცნობით, ეს ტრავმა შესაძლოა სერიოზულ საფრთხეს უქმნიდეს მის მონაწილეობას მოახლოებულ მსოფლიო ჩემპიონატზე.

სალიბა საფრანგეთის ნაკრების ძირითად ცენტრალურ მცველად დამკვიდრდა და დაცვის ცენტრში, როგორც წესი, მიუნხენის ბაიერნის მცველთან, დაიო უპამეკანოსთან ერთად თამაშობს.

თუმცა, Foot Mercato-ს ინფორმაციით, დიდიე დეშამსს შესაძლოა ცენტრალური მცველების წყვილის გადახალისება მოუწიოს, სულ მცირე მსოფლიო ჩემპიონატის საწყის ეტაპზე მაინც.

საფრანგეთის ნაკრები ხუთშაბათს მსოფლიო ჩემპიონატის მოსამზადებელ მატჩში კოტ-დ’ივუარის წინააღმდეგ ითამაშებს, ხოლო ტურნირზე პირველ შეხვედრას 16 ივნისს სენეგალის წინააღმდეგ გამართავს.