"თამაშით ბოლომდე კმაყოფილი არ ვარ" - სანიოლმა ბაჰრეინთან მატჩი შეაფასა

საქართველოს ეროვნულმა გუნდმა ბაჰრეინის ნაკრებს ამხანაგური შეხვედრა 2:0 მოუგო. თამაში ვილი სანიოლმა პრესკონფერენციაზე შეაფასა.

"სამი ცენტრალური მცველით ვითამაშეთ, რადგან ეს მატჩი სექტემბრისთვის მოსამზადებლად უნდა გამოგვეყენებინა. ამხანაგური მატჩები ყოველთვის იმისთვის არის, რომ ოფიციალური თამაშებისთვის მოემზადო.

ივნისში, ხანგრძლივი სეზონის შემდეგ, ფეხბურთელებისთვის ყოველთვის რთულია ენერგიის ბოლო რესურსების მობილიზება. ვეცადეთ, მოთამაშეებისთვის დამატებითი მოტივაცია მიგვეცა და მეორე ტაიმი უკეთესი გამოგვივიდა.

საერთო ჯამში, ამ შეკრებით ძალიან კმაყოფილი ვარ. თუმცა, დღევანდელი თამაშით ბოლომდე არ ვარ კმაყოფილი, რაც ბუნებრივია.

ზოგჯერ უნდა მიიღო ის ფაქტი, რომ მსგავსი ხასიათის მატჩს დიდი ანგარიშით ვერ იგებ, მაგრამ გამარჯვება მაინც გამარჯვებაა. ასეთი მოგებები გვეხმარება, პოზიტიური დინამიკა შევინარჩუნოთ", - აღნიშნა ფრანგმა სპეციალისტმა.

საქართველოს ნაკრებმა, ბაჰრეინთან გამარჯვებამდე, რუმინეთთან 1:1 ითამაშა. ჯვაროსნები ერთა ლიგის ახალ გათამაშებას 25 სექტემბერს, ჩრდილოეთ ირლანდიასთან საშინაო მატჩით იწყებენ.

ფოტო: NAKREBI.GE

საქართველოს ნაკრებმა ბაჰრეინი დაამარცხა