VIDEO: 1973 წლის შემდეგ პირველად - ნიუ იორკ ნიქსი NBA-ის ჩემპიონია

NBA-ის 2025-26 წლების სეზონის გამარჯვებული ნიუ იორკ ნიქსი გახდა - ფინალურ სერიაში სან ანტონიო სპერსს 4:1 მოუგეს.

მაიკ ბრაუნის გუნდმა ტექსასელებს სერიის მე-5 შეხვედრაშიც ქამბექით აჯობა - მასპინძლები 16 ქულით წინ იყვნენ, თუმცა ნიქსის კალათბურთელებმა ბოლო მეოთხედი ბევრად უკეთესად ჩაატარეს და 94:90 გაიმარჯვეს.

სუპერ მატჩი ჩაატარა ჯეილენ ბრანსონმა, რომელმაც გუნდს 45 ქულა, 3 მოხსნა, 3 ასისტი შესძინა; 14 ქულა, 2 მოხსნა, 4 ასისტი ჰქონდა მიკალ ბრიჯისს; ჯოშ ჰარტმა ორმაგი დუბლი მიითვალა - 13 ქულა, 11 მოხსნა, 2 ასისტი; ხოლო ოგუგუა ანუნობის ანგარიშზე 11 ქულა, 8 მოხსნა გახლდათ. რაც შეეხება კარლ-ენტონი თაუნსს მხოლოდ 2 ქულა ჩაიწერა აქტივში, 10 მოხსნასა და 1 ასისტთან ერთად.

ჯეილენ ბრანსონი ნიუ იორკის ისტორიაში ფინალური სერიის მატჩებში საუკეთესო მექულეა - აქამდე ეს რეკორდი ეკუთვნოდა ვილის რიდს, რომელმაც 1970 წლის ფინალური სერიის მე-3 თამაშში ლოს ანჯელეს ლეიკერსს 38 ქულა ჩაუგდო.

შედეგად, დიდი ვაშლის ქალაქის წარმომადგენლებმა 4-დან 3 თამაში სტუმრად მოიგეს, ერთხელ კი მედისონ სქუეარ გარდენში მიაღწიეს წარმატებას და ნანატრი ჩემპიონობა ასე გაიფორმეს - ნიუ იორკ ნიქსმა NBA-ის საჩემპიონო ტიტული ისტორიაში მესამედ, 1973 წლის შემდეგ კი პირველად მოიპოვა.

ნიქსმა აღმოსავლეთ კონფერენციის რეგულარული სეზონი მე-3 ადგილზე დაასრულა, პლეი-ოფის პირველ ეტაპზე ატლანტა ჰოუქსი 4:2 დაამარცხა, რის შემდეგაც ფილადელფიასა და კლივლენდს 4:0-ები მოუგო, სუპერ ფინალში კი სან ანტონიოსთან 4:1 გაიმარჯვა.

გუნდს პლეი-ოფში 13-მატჩიანი მოგებათა სერია ჰქონდა, რაც NBA-ის ისტორიაში მე-2 შედეგია - გოლდენ სტეიტ უორიორსმა 2017-ის პლეი-ოფში მიჯრით 15 გამარჯვება იზეიმა.

ნიუ იორკ ნიქსი ლარი ო'ბრაიენის სახელობის საჩემპიონო ჯილდოს 1970; 1973 და 2026 წლებში დაეუფლა და მაიამის, დეტროიტისა და ფილადელფიას მაჩვენებელს გაუთანაბრდა - სან ანტონიო 5-გზის ჩემპიონია, ჩიკაგოს 6 ჩემპიონობა აქვს, გოლდენ სტეიტს - 7, ლეიკერსს - 17, ხოლო ბოსტონს - 18.

აღნიშნული 3 ჩემპიონობის გარდა, ნიქსს 7 ფინალი აქვს წაგებული. რაც შეეხება სან ანტონიოს, გუნდმა NBA-ის სუპერ ფინალში მეშვიდედ იასპარეზა და მეორედ დამარცხდა.

VIDEO: ისტორიაში უდიდესი ქამბექი - ნიქსმა სპერსს საოცარი სცენარით მოუგო