VIDEO: დომინანტურად - სან ანტონიომ ოკლაჰომა სოლიდურად დაამარცხა
1 სთ წინ · 0 წთ წასაკითხად
-
Aa
+
ფონტის ზომა
NBA-ის დასავლეთ კონფერენციის ფინალური სერიის მე-4 მატჩში, სან ანტონიო სპერსმა ოკლაჰომა სიტი თანდერი 21-ქულიანი სხვაობით დაამარცხა და სერიაში ანგარიში გაათანაბრა - 2:2.
საწყის წუთებში OKC 7:8 დაწინაურდა, რაც შეხვედრის განმავლობაში გუნდის წინ ყოფნის ერთადერთი შემთხვევა გამოდგა. ტექსასელებმა მეტოქეს ოთხივე მეოთხედი დამაჯერებლად მოუგეს, მესამე მეოთხედში მათმა უპირატესობამ 27 ქულამდეც მიაღწია, საბოლოოდ კი 103:82 გაიმარჯვეს.
ვიქტორ ვემბანიამა მოედანზე საუკეთესო იყო - 33 ქულა, 8 მოხსნა, 5 ასისტი, 2 ჩაჭრა, 3 დაფარება; სტეფონ ქასლმა გამარჯვებულებს 13 ქულა, 3 მოხსნა, 6 ასისტი შეჰმატა; დეივინ ვასელმა - 13 ქულა, 6 მოხსნა, 3 ასისტი; დე'აარონ ფოქსი კი ერთადერთი იყო, ვინც ორმაგი დუბლი შეასრულა - 12 ქულა, 10 მოხსნა, 5 ასისტი.
"ვფიქრობ, დაცვაში შესანიშნავი თამაში ვაჩვენეთ. ჩვენ უბრალოდ მათი მსროლელების სათანადოდ აყვანა შევძელით და მათ ბევრი სამქულიანის სროლის საშუალება არ მივეცით. ბოლო მატჩებში ბევრი სამქულიანი ჩაგვიგდეს და დღეს ამის, სწრაფი თამაშით, არიდებას ვცდილობდით", - ეს დეივინ ვასელის მატჩისშემდგომი შეფასებაა.
მოქმედ ჩემპიონთა შორის, ყველაზე შედეგიანი შაი გილჯეს-ალექსანდერი გახლდათ - 19 ქულა, 4 მოხსნა, 7 ასისტი; ჩეტ ჰოლმგრენს კი ორმაგ დუბლამდე ცოტა დააკლდა - 10 ქულა, 9 მოხსნა, 2 ასისტი.
შედეგად, სერიაში ანგარიში 2:2-ია და მოედნის უპირატესობა ოკლაჰომელებს აქვთ. მომდევნო მატჩი, 27 მაისის 04:30 საათზე, ოკლაჰომაში გაიმართება, რის შემდეგაც გუნდები ისევ სან ანტონიოში ითამაშებენ, ხოლო თუკი მე-7 შეხვედრის საჭიროება გახდა, ის ოკლაჰომაში ჩატარდება.
