VIDEO: გამარჯვება ბოლო 14 წამში - შერმადინის ტენერიფემ რეალ მადრიდს სტუმრად მოუგო

გიორგი შერმადინის ლაგუნა ტენერიფემ, ლიგა ენდესას 1/4 ფინალური ეტაპის პირველ მატჩში, რეალ მადრიდი სტუმრად დაამარცხა და მოედნის უპირატესობა მოიპოვა.

მადრიდელები მეორე პერიოდში 12 ქულითაც დაწინაურდნენ, თამაშის დასრულებამდე 14 წამით ადრე კი 4 ქულით იყვნენ წინ - საბოლოოდ, კანარიელებმა ბოლო 14 წამში ორი 3-ქულიანი ჩააგდეს და დრამატულად გაიმარჯვეს - 98:97.

ტენერიფეს რიგებში შერმადინს ისევ არ უთამაშია, ხაიმე ფერნანდესმა და უესლი ვან ბეკმა 17-17 ქულა ჩააგდეს, ხოლო ტიმ აბრომაიტისსა და აარონ დოორნეკამპს 15-15 ქულა ჰქონდათ.

შერმოს ზედიზედ მესამე შეხვედრაში არ მიუღია მონაწილეობა - თავი შეუძლოდ იგრძნო და ექიმების მეთვალყურეობის ქვეშაა. 

ქართველი ცენტრი რეგულარულის 1-ელი და მე-10 ტურის საუკეთესო მოთამაშედ დაასახელეს, ოქტომბერში კი საერთოდ თვის საუკეთესო მოთამაშის ჯილდო მოიპოვა.

სერიის მომდევნო მატჩი უკვე ტენერიფეშია - 4 ივნისის 23:00 საათზე.