VIDEO: ისტორიაში უდიდესი ქამბექი - ნიქსმა სპერსს საოცარი სცენარით მოუგო
11 ივნ, 2026 · 0 წთ წასაკითხად
-
Aa
+
ფონტის ზომა
ნიუ იორკ ნიქსმა NBA-ის ფინალების ისტორიაში უდიდესი ქამბექი შეასრულა და სან ანტონიო სპერსთან სერიაში 3:1 დაწინაურდა.
მედისონ სქუეარ გარდენში გამართული მატჩი მასპინძლებმა საშინლად დაიწყეს, ტექსესელები კი ფანტასტიკურად გამოიყურებოდნენ - პირველი მეოთხედი 19-ქულიანი სხვაობით დასრულდა, დიდ შესვენებაზე კი გუნდები 27-ქულიანი სხვაობით გავიდნენ (49:76).
მესამე პერიოდის სტარტზე სპერსის უპირატესობა 29 ქულამდე გაიზარდა, რის შემდეგაც ნიქსი ჯერ 20-ქულიან ზღვარში შევიდა, ბოლო მეოთხედის წინ კი -15 ჰქონდა, თუმცა პერიოდის დასაწყისშივე -20-ით ჩამორჩა.
ამის შემდეგ დარბაზში და ტელეეკრანებთან მყოფმა მაყურებელმა საოცარი განვითარება იხილა - მაიკ ბრაუნის გუნდმა თამაში თანდათან დაქაჩა და შეხვედრაში წინ პირველად სირენამდე 82 წამით ადრე გავიდა (105:104), რის შემდეგაც სტეფონ ქასლმა 2 საჯარიმო ჩააგდო და სტუმრები ისევ დაწინაურდნენ... დამთავრებამდე 5.7 წამი რჩებოდა, როცა ნიქსს ბურთი გადაეცა, ჯეილენ ბრანსონმა სამქულიანი ვერ ჩააგდო, თუმცა დამატებაზე ოგუგუა ანუნობი გაფრინდა და გასაოცარი სირთულის ეპიზოდი ოქროს 2-ქულიანით დაასრულა. სპერსს შესატევად 1.2 წამი დარჩა, ვერ ჩააგდეს და ისტორიაში უდიდესი ქამბექი შედგა - 107:106.
NBA-ის ფინალების ისტორიაში პირველად მოხდა, როცა გუნდი 29 ქულით მარცხდებოდა და თამაშის მოგება მოახერხა.
ბრანსონმა გამარჯვებაში წვლილი 36 ქულით, 5 მოხსნითა და 7 ასისტით შეიტანა; სუპერ მატჩი ჰქონდა მთავარ გმირ ოჯი ანუნობის, რომელმაც ოქროს 2-ქულიანამდე, ასევე ბოლო წამებზე, უმნიშვნელოვანესი დაფარებაც შეასრულა - 33 ქულა, 4 მოხსნა, 1 ასისტი; ხოლო კარლ-ენტონი თაუნსმა 13 ქულა, 10 მოხსნა, 2 ასისტი მიითვალა.
სპერსის მხარეს ორმაგი დუბლი შეასრულა ვიქტორ ვემბანიამამ - 24 ქულა, 13 მოხსნა, 1 ასისტი, 3 დაფარება; დილენ ჰარპერმა 21 ქულა, 4 მოხსნა, 3 ასისტი ჩაიწერა აქტივში; დე'აარონ ფოქსსა და დეივინ ვასელს 18-18 ქულა ჰქონდათ; სტეფონ ქასლმა კი 13 ქულა ჩააგდო.
შედეგად, დიდი ვაშლის ქალაქის წარმომადგენლები სერიაში 3:1 დაწინაურდნენ და ნანატრ ბეჭდებამდე 1 გამარჯვება აშორებთ. მომდევნო თამაში სან ანტონიოშია - 14 ივნისის 04:30 საათზე.
