VIDEO: მარცხი საბერძნეთში - თოკოს ბარსელონამ ევროლიგაზე მეცხრედ წააგო

თორნიკე შენგელიას ბარსელონამ ევროლიგის მიმდინარე სეზონში მე-9 შეხვედრა წააგო.

კატალონიელები ერთ-ერთ მთავარ კონკურენტ ოლიმპიაკოსს სტუმრად დაუპირისპირდნენ, სამი მეოთხედი თანაბარ ბრძოლაში დარჩნენ, ბოლო ათწუთეულში კი მეტოქე გაცილებით უკეთესი იყო - 75:87.

თოკო ბარსას ძირითად ხუთეულში იყო, პარკეტზე 26:51 წუთი გაატარა და საკუთარ გუნდს 12 ქულა, 8 მოხსნა, 1 ასისტი შეჰმატა.

25 ტურის შემდეგ, ბარსელონას 16 მოგება და 9 წაგება აქვს, ცხრილის მე-6 ადგილზეა, თუმცა ლიდერ ფენერბაჰჩეს მხოლოდ 1 გამარჯვებით ჩამორჩება - ფენერს 1 თამაშით ნაკლებიც აქვს ჩატარებული.

მომდევნო ტურში ესპანელები სწორედ ამჟამინდელ ლიდერსა და მოქმედ ჩემპიონ ფენერბაჰჩეს ხვდებიან - 3 თებერვალს თავიანთ არენაზე უმასპინძლებენ.