მანჩესტერ იუნაიტედის მთავარი მწვრთნელის ასისტენტმა, სტივ ჰოლანდმა განაცხადა, რომ კლუბის ამბიციები გაცილებით მეტია, ვიდრე უბრალოდ ჩემპიონთა ლიგის საგზურის მოპოვება.
მას შემდეგ, რაც იანვრის შუა რიცხვებში გუნდი მაიკლ კერიკმა ჩაიბარა, ოლდ ტრაფორდის ბინადრებმა პრემიერ ლიგის სატურნირო ცხრილში მესამე ადგილზე გადაინაცვლეს. სეზონის დასრულებამდე 7 ტურით ადრე, გუნდი კარგ პოზიციაშია, რათა ერთწლიანი პაუზის შემდეგ ევროპის ელიტურ ტურნირს დაუბრუნდეს.
სტივ ჰოლანდი აცხადებს:
ვფიქრობ, ამ კლუბში ჩვენი მიზანი უნდა იყოს ასეთი: რაც შეიძლება მწვერვალთან ახლოს დავასრულოთ სეზონი. არ ვიცი რამდენად შესაძლებელია ეს, მაგრამ გამოწვევა ყოველთვის უნდა იყოს, რომ მივუახლოვდეთ პირველ ადგილს მაქსიმალურად.
ფეხბურთელებს უფრო მეტად საკუთარი მატჩების მოგებაზე ვესაუბრებით, ვიდრე იმაზე, თუ რა ხდება ჩვენს ქვემოთ ცხრილში. ცხადია, არსებული კონტექსტიდან გამომდინარე, ჩემპიონთა ლიგის ზონაში მოხვედრა კარგი შედეგი იქნება, მაგრამ ვფიქრობ, ყოველთვის იმაზე მეტისკენ უნდა ვიყურებოდეთ, რაც გვაქვს.
იუნაიტედი შანსები ჩემპიონთა ლიგაზე მოსახვედრად კიდევ უფრო გაიზარდა მას შემდეგ, რაც არსენალმა სპორტინგი 1:0 დაამარცხა. ამ შედეგით პრემიერ ლიგამ უეფას რეიტინგში დამატებითი ადგილი (European Performance Spot) გაინაღდა, რაც იმას ნიშნავს, რომ მომავალ სეზონში ინგლისს ტურნირზე მინიმუმ ხუთი კლუბი ეყოლება. ამ მომენტისთვის იუნაიტედი მეექვსე ადგილზე მყოფ ჩელსის შვიდი ქულით უსწრებს.
გუნდმა ახლახან დაასრულა საწვრთნელი შეკრება დუბლინის მახლობლად. მათ 24-დღიანი უჩვეულო პაუზა ჰქონდათ ბორნმუთთან მატჩის (20 მარტი) შემდეგ სანამ ორშაბათს ლიდს იუნაიტედს დაუპირისპირდებიან. ეს ხანგრძლივი შესვენება სანაკრებო პაუზისა და თასებიდან ადრეული გამოვარდნის შედეგია.
ჰოლანდმა აღნიშნა:
ვფიქრობ, ბორნმუთისა და ლიდსის მატჩებს შორის ჩავარდნა პრემიერ ლიგის რეკორდია დროის თვალსაზრისით. მივიჩნიეთ, რომ მნიშვნელოვანი იყო მთელი ჯგუფის შეკრება, რათა სეზონის ღირსეულად დასრულებაზე ვფოკუსირებულიყავით
