"B ლიგაში ადგილის შენარჩუნება მნიშვნელოვანი იყო, თამაშით კმაყოფილი ვარ" - სანიოლის პრესკონფერენცია

ერთა ლიგაზე სომხეთთან 6-1 მოგებული მატჩის შემდეგ საქართველოს ნაკრების მთავარმა მწვრთნელმა, ვილი სანიოლმა მედიასთან ისაუბრა.

"ყველა ტურნირზე გვსურს, რომ კარგი შედეგი ვაჩვენოთ. ამ ეტაპზე მნიშვნელოვანი იყო B ლიგაში ადგილის შენარჩუნება, რათა იგივე დონის გუნდებთან ვითამაშოთ, რაც ჩვენი განვითარებისთვის ძალიან მნიშვნელოვანია.

დღევანდელი თამაშით ძალიან კმაყოფილი ვარ, განსაკუთრებით პირველი ტაიმით, მეორე ნახევარში იმავე ინტენსივობის შენარჩუნება რთული იყო. ამ თამაშმა კარგი განცდები დაგვიტოვა.

მიქაუტაძეზე შეიძლება ითქვას, რომ ახლა საუკეთესო ფორმაშია, მაგრამ ის ახალგაზრდაა და მომატება კიდევ შეუძლია. ეს იმაზეცაა დამოკიდებული, კლუბში რამდენად ექნება სათამაშო პრაქტიკა.

ყველა ფეხბურთელს, განსაკუთრებით მიქაუტაძეს, ევროპის ჩემპიონატმა თავდაჯერება შესძინა. მასში ყველაზე მეტად მენტალიტეტი მომწონს. მიუხედავად იმისა, რომ ის საფრანგეთში დაიბადა, მიხარია, რომ ქართველია.

ერევანში გოგლიჩიძემ და ლოჩოშვილმა კარგად ითამაშეს, თანაც, მათთვის ეს პირველი მატჩი იყო, რომელიც ერთად ჩაატარეს. დღეს კაშია დაგვიბრუნდა, რომელიც ყველამ ვიცით, როგორი პროფესიონალია.

ევროპის ჩემპიონატის შემდეგ დავიწყეთ მომავალზე ფიქრი, განსაკუთრებით დაცვაში, სადაც რამდენიმე ასაკოვანი ფეხბურთელი გვყავს. საბა ნიჭიერი და პერსპექტიული ფეხბურთელია, ყველაფერი მასზეა დამოკიდებული და შეუძლია, რომ წლების განმავლობაში ითამაშოს საქართველოს ნაკრებში.

ივნისის შეკრებაზე პრიორიტეტი U21 ნაკრებს დაეთმობა, რადგან ევროპის ჩემპიონატზე ითამაშებს და ეს ტურნირი ჩვენი ახალგაზრდა ფეხბურთელებისთვის დიდი გამოცდილება იქნება. მათ, ვისაც ასაკით შეუძლიათ თამაში, ევროპის ჩემპიონატისთვის ახალგაზრდულ ნაკრებს დავუთმობთ.

ჩემზე არაა დამოკიდებული, ესპანეთი მოხვდება თუ ნიდერლანდები ჯგუფში, მაგრამ მე ნიდერლანდებს ვისურვებდი. ესპანეთთან ხშირად მოგვიწია ბოლო წლებში თამაში. შემიძლია იმის თქმა, რომ ვინც არ უნდა იყოს, ბოლომდე დავიხარჯებით.

ახლა მიქაუტაძე ისეთ ფორმაშია, რომ ძნელია მისი სკამზე დასმა, ამიტომ მოუწიათ ბუდუსა და სხვა შემტევებს მცირე სათამაშო დრო.

მესმის, რომ ისინი მეტ დროს ელოდნენ, მაგრამ უნდა გააგრძელონ შრომა და მომავალში მიეცემათ შანსი. ჩემი მიზანია, რომ გუნდი მსოფლიოს ჩემპიონატის შესარჩევი ეტაპისთვის კარგად მოვამზადო.

4 წლის წინ გადავწყვიტე სამმცველიან ფორმაციაზე გადასვლა, რადგან ეს საუკეთესო გამოსავალი იყო რესურსიდან გამომდინარე, მაგრამ უკვე ლოჩოშვილი, გოგლიჩიძე კლუბში ბევრს თამაშობენ და შეგვიძლია სხვა ვარიანტებიც განვიხილოთ." - განაცხადა ვილი სანიოლმა.

გოლების წვიმა და ზეიმი დინამო არენაზე - საქართველომ B ლიგაში ადგილი შეინარჩუნა