ბაიერნის ვარსკვლავის ავარია და სასჯელი

მიუნხენის ბაიერნის ვარსკვლავ ჯამალ მუსიალას, ავტოავარიის გამო, სასამართლომ მართვის მოწმობა ჩამოართვა და სოლიდური ჯარიმა დააკისრა.

შემთხვევა ჯერ კიდევ 2025 წლის აპრილში მოხდა, თუმცა განაჩენი ახლახან შევიდა ძალაში.

გამოძიების მიხედვით, მუსიალამ მაგისტრალზე, სადაც სიჩქარე 120 კმ/სთ-მდე იყო შეზღუდული, 194 კმ/სთ სიჩქარით მოძრაობისას ავარია გამოიწვია და სხვა ავტომობილს დაეჯახა. შემთხვევის შედეგად ორმა ადამიანმა მსუბუქი დაზიანებები მიიღო, ხოლო მიყენებული ზარალი 200 ათას ევროდ შეფასდა. სასამართლომ ფეხბურთელი გაუფრთხილებლობით სხეულის დაზიანებასა და მოძრაობის საფრთხის შექმნაში ცნო დამნაშავედ. მუსიალას ლიცენზია ჩამოერთვა და ახლის აღებას მინიმუმ 9 თვე ვერ შეძლებს. „სასჯელი მივიღე. ეს ავარია ჩემთვის ცხოვრებისეული გაკვეთილი იყო“, - განაცხადა მუსიალამ Bild-თან ინტერვიუში.

ეს ავარია ფეხბურთელისთვის 2025 წლის ერთადერთი პრობლემა არ ყოფილა. რამდენიმე თვის შემდეგ, მსოფლიო საკლუბო ჩემპიონატზე, პსჟ-ს მეკარე ჯანლუიჯი დონარუმასთან შეჯახებისას, მან მცირე წვივის ძვალი გაიტეხა და მყესები გაიწყვიტა.

23 წლის შემტევი მოედანს იანვარში კი დაუბრუნდა, მაგრამ ძველი ფორმის აღდგენას, მუნდიალის მოახლოების მიუხედავად, მაინც უჭირს. ბაიერნის მწვრთნელი ვინსენტ კომპანი მას სრულ მხარდაჭერას უცხადებს და სჯერა, რომ მუსიალა თავის ჯადოსნურ თამაშს მალე აუცილებლად დაიბრუნებს.