დააბრუნებს ჰარი ფეხბურთს სახლში? - როგორ ფორმაში ხვდება კეინი მუნდიალს

ბლოგების სერიას, თუ როგორ ფორმაში ხვდებიან მუნდიალს მსოფლიოს გამორჩეული ფეხბურთელები, ინგლისის ნაკრების კაპიტნით, ოქროს ბურთის ერთ-ერთი მთავარი ფავორიტით, ჰარი კეინით ვაგრძელებთ. 

ბუნდესლიგის ბოლო ტურში ბაიერნმა შინ კიოლნს 5:1 სძლია - ჰარი კეინი სეზონში მეოთხე ჰეთ-თრიქით გამოირჩა და სამ სეზონში მეორედ მიაღწია 36-გოლიან ნიშნულს. ამ მაჩვენებლით ინგლისელი მხოლოდ ლეგენდარულ გერდ მიულერს ჩამორჩება, რომელმაც 36+ გოლის გატანა სამ სხვადასხვა სეზონში შეძლო. 

2025/26 წლების სეზონში ინგლისელმა კლუბსა და ნაკრებში 55 მატჩი ჩაატარა და 70 გოლში მიიღო მონაწილეობა - 63 გოლი და 7 საგოლე გადაცემა. კეინის მარაგში კიდევ ერთი საკლუბო მატჩია მუნდიალამდე - ბაიერნი გერმანიის თასის ფინალში შტუტგარტს დაუპირისპირდება. 

კეინი ბუნდესლიგის საუკეთესო ბომბარდირის ჯილდოთო - 36 გოლი.

ჰარიმ ინგლისის ნაკრებს ორ მუნდიალზე უკაპიტნა. პირველად 2018 წელს რუსეთში, სადაც 6 გოლით ტურნირის საუკეთესო ბომბარდირიც გახდა - მიუხედავად ოქროს ბუცისა, გულშემატკივრებს მაინც ხორვატიასთან ნახევარფინალში მისი გაფუჭებული მომენტი ახსოვთ. გარეტ საუთგეიტის გუნდი 2018-ში მეოთხე ადგილს დასჯერდა.

სუბასიჩი იგერიებს კეინის დარტყმულს. ხორვატია 2:1 ინგლისი. 2018.

უიღბლო გამოდგა კეინისთვის 2022 წლის კატარის მსოფლიო თასიც. მეოთხედფინალში, საფრანგეთთან დაპირისპირებაში, ინგლისელს ანგარიშის გათანაბრების შანსი 84-ე წუთზე მიეცა - კეინმა პირველი თერთმეტმეტრიანისგან განსხვავებით, მეორე ვერ გამოიყენა. “სამი ლომი” ტურნირს გამოეთიშა.

კეინის გაფუჭებული თერთმეტმეტრიანი. საფრანგეთი 2:1 ინგლისი. 2022.

კეინის დებიუტი ინგლისის ნაკრებში 2015 წელს შედგა, მას შემდეგ ჰარიმ 112 შეხვედრა ჩაატარა, 78 გოლი გაიტანა და 19 საგოლე გადაცემა შეასრულა. კეინი ორჯერ იყო ახლოს ევროპის ჩემპიონობასთან - ინგლისელებმა 2021-ში იტალისთან დათმეს ფინალი, ხოლო 2024-ში ესპანეთთან. 

2026 წლის მუნდიალი ალბათ ბოლო შანსი იქნება ჰარისთვის 60 წლის შემდეგ ინგლისში ნანატრი თასი ჩაიტანოს ანუ, როგორც ინგლისელები იტყვიან ფეხბურთი სახლში დააბრუნოს. 

ტურნირი ერთ-ერთ მთავარ ფავორიტად შერაცხული “სამი ლომი” მუნდიალამდე ორ ამხანაგურ შეხვედრას 7 და 11 ივნისს, ახალი ზელანდიასა და კოსტა რიკის წინააღმდეგ გამართავს. მსოფლიო თასის ჯგუფში კი ტომას ტუხელის შეგირდები ხორვატიას, განასა და პანამის ნაკრებებს დაუპირისპირდებიან. ტომას ტუხელი საბოლოო, 26-კაციან სიას პარასკევს, 22 მაისს გამოაცხადებს.

 ფიფას რიგით 23-ე მსოფლიო თასი 11 ივნისს, 23:00 მექსიკისა და სამხრეთ აფრიკის დაპირისპირებით გაიხსნება.

როგორ ფორმაში ხვდება მესი მეექვსე მუნდიალს