ბოტასი და პერესი - კადილაკი გამოცდილი დუეტით იწყებს

ფორმულა 1-ში კადილაკის გუნდმა ოფიციალურად დაადასტურა ორი მრბოლელის კონტრაქტი.

10-გზის გრან-პრის გამარჯვებული ვალტერი ბოტასი და 6-გზის გრან-პრის გამარჯვებული სერხიო ჩეკო პერესი, რომლებიც გუნდს ფორმულა 1-ში სადებიუტო, 2026 წლის სეზონში გაუძღვებიან.

"ბოტასი და პერესი ერთად გუნდს უზარმაზარ გამოცდილებას, ლიდერულ თვისებებსა და ტექნიკურ ცოდნას შესძენენ, რაც კადილაკის გუნდს საშუალებას მისცემს უმაღლეს სარბოლო სერიაში დამაჯერებლად დაიწყოს ბრძოლა. 500-ზე მეტი ერთობლივი გრან-პრის სტარტით, 100-ზე მეტი პოდიუმითა და დიდი გამოცდილებით, ეს დუეტი პირველივე დღიდან მნიშვნელოვანი ფიგურა იქნება გუნდის საფუძვლის ჩამოყალიბებაში." - წერია კადილაკის განცხადებაში.

ვალტერი ბოტასის დებიუტი ფორმულა 1-ში 2013 წელს შედგა. მას ჯამში 246 რბოლა აქვს ჩატარებული, საიდანაც 10 მოიგო, 67-ჯერ პოდიუმზე მოხვდა, 20-ჯერ კი პოულ პოზიცია დაიმსახურა. მას უსწრაფესი წრე 19-ჯერ აქვს დაფიქსირებული, საჩემპიონო დავაში კი 2019 და 2020 წლებში მე-2 ადგილი დაიკავა.

სერხიო პერესის დებიუტი F1-ში 2011 წელს შედგა, მან 281 რბოლა ჩაატარა, საიდანაც 6 მოიგო, 39-ჯერ პოდიუმზე მოხვდა, 3-ჯერ კი პოულ პოზიცია დაიკავა. მან უსწრაფესი წრე 12-ჯერ დააფიქსირა, 2023 წელს კი საჩემპიონო დავაში მე-2 ადგილზე გავიდა.