ევრო 2024-ის პირველ 1/4 ფინალურ შეხვედრაში ესპანეთი მასპინძელ გერმანიას დაუპირისპირდა.
მატჩი საკმაოდ დაძაბული გამოდგა. ყველაფერი შეხვედრის სტარტზევე დაიწყო, როცა ტონი კროოსმა პედრის წინააღმდეგ უხეშად ითამაშა, ესპანელმა კი თამაში ვეღარ გააგრძელა, მის ნაცვლად კი მე-8 წუთზე დანი ოლმო გამოვიდა.
დაპირისპირების დაძაბულობა თითოეულ მომენტში იგრძნობოდა. პირველ ტაიმში 15 ჯარიმა და 3 ყვითელი ბარათი ვიხილეთ.
მატჩის მეორე ნახევარი სწრაფი გოლით დაიწყო. 51-ე წუთზე შეცვლაზე შემოსულმა დანი ოლმომ აიღო მანუელ ნოიერის კარი. საგოლე გადაცემა ლამინ იამალმა გააკეთა, რომელმაც უკვე მე-3 ასისტი მიითვალა მიმდინარე ტურნირზე.
გოლის შემდეგ ინიციატივა ხელთ გერმანიის ნაკრებმა იგდო და ბოლო წუთებამდე ცდილობდა ანგარიშის გათანაბრებას. საბოლოოდ 89-ე წუთზე ფლორიან ვირცმა მოახერხა უნაი სიმონის კარის ბადის შერხევა და მასპინძლებმა თამაშის დამატებით დროში გადაყვანა შეძლეს.
დამატებით ტაიმებში სიტუაცია კვლავ დაძაბული იყო და ყველაფერი პენალტების სერიამდე მიდიოდა, თუმცა 119-ე წუთზე ყველაფერი შეიცვალა. დანი ოლმოს საჯარიმოში ჩაწოდების შემდეგ უმეთვალყურეოდ დატოვებულმა მიკელ მერინომ თავით ბურთი კარისკენ გადაგზავნა და ესპანეთს გამარჯვება მოუტანა.
მატჩი წითელი ბარათით დანი კარვახალმა დააგვირგვინა, რომელმაც 126-ე წუთზე მეორე ყვითელი ბარათი მიიღო.
დაპირისპირების ხასიათზე სტატისტიკაც მიუთითებს, ჯამში ენტონი ტეილორს ჯარიმის დანიშვნა 39-ჯერ მოუწია, ჯამში კი მოთამაშეებს 15 ყვითელი და 1 წითელი ბარათი უჩვენა.
მასპინძელი გერმანია ევრო 2024-ს გამოეთიშა, ლეგენდარული გერმანელი ნახევარმცველისთვის, ტონი კროოსისთვის კი დღეს საფეხბურთო კარიერა დასრულდა. მოთამაშეს გაცხადებული ჰქონდა, რომ ევროპის ჩემპიონატის შემდეგ ის კარიერას დაასრულებდა და ეს დღეც დადგა.
ესპანეთი კი ტურნირის 1/2 ფინალშია, სადაც პორტუგალიისა და საფრანგეთის ნაკრებთა შორის გამარჯვებულს დაელოდება.
