მერაბ დვალიშვილმა სოციალურ ქსელში ვიდეო გამოაქვეყნა, რომელშიც პიოტრ იანთან შესაძლო ტრილოგიაზე საუბრობს.
,,რაც შეეხება ჩემს ბრძოლას, როგორც ყველამ ნახეთ, ინფორმაცია დაიდო, რომ UFC ცდილობს ამ ბრძოლის დანიშვნას აბუ დაბიში, მაგრამ იანს ჯერ არ დაუდასტურებია.
მე ჯერ კონტრაქტზე ხელი არ მომიწერია, მაგრამ სავარაუდოდ ჩვენი ბრძოლა აბუ დაბიში გაიმართება. მე ველოდები იანი როცა დაადასტურებს, მერე UFC უკვე გამომიგზავნის კონტრაქტს და UFC-ც დააანონსებს.
კიდევ ვიძახი, UFC-ს ჯერ არ დაუდია და ოფიციალურად არ არის ეს ბრძოლა გადაწყვეტილი, მაგრამ მე ვვარჯიშობ, ვემზადები დღეში რამდენჯერმე.
მოკლედ ოპტიმალურ ფორმაში ვხვდები ამ ბრძოლას. რა თქმა უნდა, არ დავაკლებ მომზადებას, შრომას, ვარჯიშს, როგორც ფსიქოლოგიურად, ისე ფიზიკურად.
დარწმუნებული ვარ, რომ საუკეთესო შედეგს დავდებთ და გავიმარჯვებთ ამ ბრძოლაში. აუცილებლად ამ ბრძოლას ჩემს სტილში წავიყვან.
გენაცვალეთ, მადლობა კიდევ ერთხელ გულშემატკივრობისთვის. თქვენც ყველა ქართველს გისურვებთ წარმატებებს, ძალა ერთობაშია და ერთობით გაგვემარჯვოს.
ველოდებით UFC-ის დაანონსებას, რომ დაინიშნება ჩემი ჩხუბი. მანამდე მე ვვარჯიშობ გიჟივით." - ამბობს დვალიშვილი ვიდეოში.
დიდი ალბათობით, ქართველსა და რუსს შორის ტრილოგია 24 ოქტომბერს UFC 333-ზე შედგება. აღნიშნული ღონისძიება აბუ დაბიში, Etihad Arena-ზე გაიმართება.
დვალიშვილმა და იანმა UFC-ში ბოლო ბრძოლა სწორედ ერთმანეთის წინააღმდეგ გამართეს, რომელშიც გამარჯვება პიოტრმა მსაჯების ერთსულოვანი გადაწყვეტილებით მოიპოვა.
აღნიშნული ბრძოლის შემდეგ რუსმა ოპერაცია გაიკეთა და რეაბილიტაციის პროცესს გადიოდა.
