ვიტალი დარასელიას სახელობის თასი 2024-ის მესამე სათამაშო დღეს, სადაც 6 კლუბის 16-წლამდელთა გუნდები იღებენ მონაწილეობას, ჯგუფური ეტაპის ბოლო მატჩები გაიმართა.
დღის პირველ შეხვედრაში საგურამოს ბაზაზე გალათასარაი ვალენსიას დაუპირისპირდა. მატჩი ესპანელთა გამარჯვებით 1-4 დასრულდა, ჯგუფური ეტაპის ბოლოს კი B ჯგუფში მდგომარეობა ასეთია.
1. ვალენსია - 6 ქულა
2. ლოკომოტივი - 3 ქულა
3. გალათასარაი - 0 ქულა
ვალენსიამ ჯგუფში პირველი ადგილი დაიკავა და პირდაპირ 1/2 ფინალში გავიდა, ლოკომოტივი და გალათასარაი კი 1/2 ფინალის საგზურის მოპოვებას პლეიოფში შეეცდებიან.
დღის მეორე მატჩში თბილისის ზღვის ბაზაზე ერთმანეთს იუვენტუსი და დინამო თბილისი შეხვდნენ. შეხვედრა ქართული გუნდის გამარჯვებით 1-3 დასრულდა.
ანგარიში მე-3 წუთზე ლუკა ციკოლიამ ბრწყინვალე საჯარიმო დარტყმით გახსნა. მე-9 წუთზე დინამოს უპირატესობა ორბურთიანი გახდა, როცა ტურინელთა მცველმა ბურთი საკუთარ კარში ჩაჭრა. პირველი ტაიმის ბოლოს იუვენტუსმა მოახერხა და შესვენებაზე მინიმალური სხვაობით გავიდა და ანგარიში 2-1 გახდა. 44-ე წუთზე შოთიკო დიაკონიძემ გამოიყენა თავისი მომენტი და ორბურთიანი უპირატესობა აღადგინა. საბოლოოდ შეხვედრაში მეტი გოლი აღარ გასულა და დინამომ იუვენტუსი 3-1 დაამარცხა.
A ჯგუფში სიტუაცია ასე დალაგდა
1. დინამო თბილისი - 6 ქულა
2. უოტფორდი - 3 ქულა
3. იუვენტუსი - 0 ქულა
თბილისურმა გუნდმა პირდაპირ 1/2 ფინალის საგზური მოიპოვა, უოტფორდი და იუვენტუსი კი პლეიოფში გააგრძელებენ ასპარეზობას.
დარასელიას თასის საპლეიოფო შეხვედრები 26 აგვისტოს გაიმართება.
18:00 / უოტფორდი - გალათასარაი
21:00 / ლოკომოტივი - იუვენტუსი
ორივე მატჩი თბილისის ზღვის ბაზაზე გაიმართება, პირდაპირი ტრანსლაციების ყურება კი საზოგადოებრივ მაუწყებელზე შეგიძლიათ.
უოტფორდსა და გალათასარაის შორის გამარჯვებული 1/2 ფინალში ვალენსიას დაუპირისპირდება, ლოკომოტივსა და იუვენტუსს შორის მოგებული კი - დინამო თბილისს.
