ესპანეთის ნაკრების მთავარმა მწვრთნელმა ლუის დე ლა ფუენტემ 2026 წლის მსოფლიო ჩემპიონატის საკვალიფიკაციო ეტაპზე საქართველოს ნაკრებთან 0-4 მოგებული მატჩის შემდეგ პრესკონფერენცია გამართა.
„საქართველო არ არის ცუდი გუნდი. მათ კარგი მოთამაშეები ჰყავთ. საქართველო დღეს სუსტი კი არ იყო, არამედ ძლიერი მეტოქე შეხვდა. ისინი ამბიციურ გუნდს დაუპირისპირდნენ, რომელსაც კარგი თამაში და მოგება სურდა. ეს საქართველოს წარუმატებლობა კი არა, ესპანეთის დამსახურებაა.
ჩვენი მოწინააღმდეგეების პატივისცემის გამო, უნდა მოვიცადოთ. ჩვენი პრიორიტეტია, რომ მიწაზე დავრჩეთ და სანამ მსოფლიო ჩემპიონატზე ოფიციალურად არ გავალთ, ეს დამოკიდებულება შევინარჩუნოთ.
ამ გუნდს ბევრი ღირსება აქვს, მათ შორის პატივისცემა. სანამ არ მოვიპოვებთ საგზურს, იგივე რეჟიმში გავაგრძელებთ მუშაობას. ფეხბურთელების გამო ბედნიერი ვარ, მაგრამ კიდევ ერთი ნაბიჯია გადასადგმელი.
წაუგებელი სერია კიდევ ერთი მიზეზია, რომ ვიამაყოთ ამ ფეხბურთელებით და გამიმართლა, რომ ამ გუნდის მწვრთნელი ვარ. ჯერ კიდევ დიდი გზაა გასავლელი. შეგვიძლია მეტის მიღწევა. ისინი ახალგაზრდები არიან, რომლებიც არ წყვეტენ გაუმჯობესებას.
ტრავმები შანსს აძლევს ნიჭიერ ახალგაზრდებს, რომლებსაც სხვა შემთხვევაში ეს შანსი არ ექნებოდათ. ამდენი კარგი მოთამაშე კლუბების წარმატებაა და ამით ვტკბებით. კლუბების, ფეხბურთელების, ფედერაციის უკან ბევრი სამუშაოა.
ჰაუსენს მცირე დისკომფორტი აქვს, პრიორიტეტი მოთამაშეზე ზრუნვაა. მას ანალიზები ჩაუტარდა და ექიმები კონტაქტზე არიან რეალის ექიმებთან. შევაფასებთ, შეუძლია თუ არა სევილიაში თამაში.
ძალიან მინდა, სევილიაში განსაკუთრებული გარემო იყოს. ეს ფეხბურთელები ამას იმსახურებენ, სევილია იმედს არასდროს გაგვიცურებს“, - თქვა ფურია როხას თავკაცმა.
0:4 ესპანეთთან - ნაკრებმა წლის ბოლო საშინაო მატჩი დიდი ანგარიშით წააგო
