"ერთიანი გუნდი ვართ და ჩემთვის თითოეული ფეხბურთელი კაპიტანია" - კვარაცხელია კაპიტნობაზე

საქართველოს ნაკრების ახალმა კაპიტანმა, ხვიჩა კვარაცხელიამ, მარტის შეკრების მეორე დღეს, სფფ-ის პრესსამსახურთან კომენტარი გააკეთა.

"ეს დიდი დაფასებაა. მადლობა ყველა იმ ადამიანს, ვინც გადაწყვიტა, რომ საქართველოს ნაკრების კაპიტანი მე უნდა ვყოფილიყავი. მიხარია და ვგრძნობ იმ პასუხისმგებლობას, რომ თითოეული ფეხბურთელისთვის მაგალითი ვიყო.

ჩვენს გუნდში არიან ისეთი ფეხბურთელები, რომელთაც ლიდერული თვისებები აქვთ და კაპიტნობა არ ნიშნავს, რომ მათ გასახდელში ამ თვისებების გამოვლენის საშუალება არ ექნებათ. რაც ყველაზე მეტად მიხარია ისაა, რომ ერთიანი გუნდი ვართ და ჩემთვის ნაკრების თითოეული წევრი კაპიტანია. მთავარია, ერთმანეთისთვის ვიბრძოლოთ.

რაც შეეხება ვიცე-კაპიტანს, კიტე ჩემთვის ძალიან მნიშვნელოვანი ფეხბურთელია და ბედნიერი ვარ, რომ გვერდით ისეთი ადამიანი მყავს, როგორიც ისაა. იმედი მაქვს, ერთად ყველაფერს გავაკეთებთ ისე, როგორც გვეკადრება. კაპიტნის სამკლავურის ტარება ტვირთი, მაგრამ, ჩემი აზრით, მე და კიტე ამას ალღოს ავუღებთ", - აღნიშნა კვარაცხელიამ.

საქართველოს ფეხბურთის ფედერაციამ ოფიციალურად გამოაცხადა, რომ გურამ კაშიას ნაკრებიდან წასვლის შემდეგ, ახალი კაპიტანი ხვიჩა კვარაცხელია იქნება, ვიცე-კაპიტანი - ოთარ კიტეიშვილი, ხოლო მეორე ვიცე-კაპიტანი - ოთარ კაკაბაძე.

ხვიჩა ახალი კაპიტანია - 10 ქართველი, რომლებმაც ნაკრებს ყველაზე მეტ მატჩში უკაპიტნეს