NBA-ის მორიგ სათამაშო დღეს ორლანდო მეჯიქი ფენიქს სანსს ესტუმრა და ანგარიშით 117:104 დამარცხდა.
სტუმართა მთავარმა მწვრთნელმა შონ სუინმა გოგა ბითაძე სასტარტო ხუთეულში არ დააყენა. ქართველმა კალათბურთელმა მოედანზე 8 წუთი და 19 წამი გაატარა, რა დროშიც საკუთარ გუნდს 4 ქულა და 5 მოხსნა მოუტანა.
მატჩის ყველაზე შედეგიანი მოთამაშე ფენიქსის გამთამაშებელი დევინ ბუკერი გახდა, რომელმაც 30 ქულა დააგროვა. ორლანდოს შემადგენლობიდან კი საუკეთესო ვენდელ კარტერი იყო 27 ქულით.
რეგულარული ჩემპიონატის მიმდინარე სეზონში ორლანდო ზედიზედ მესამედ დამარცხდა. ჩატარებული 8 მატჩიდან გუნდს მხოლოდ 2 მოგება და 6 წაგება აქვს, რითაც აღმოსავლეთ კონფერენციაში მე-12 პოზიციას იკავებს. გოგა ბითაძის გუნდი მომდევნო შეხვედრას 8 ნოემბერს, გოლდენ სტეიტ უორიორსის წინააღმდეგ გამართავს.
მიმდინარე სეზონში ქართველმა ცენტრმა ყველაზე მეტი სათამაშო დრო (12 წუთი და 18 წამი) 24 ოქტომბერს, მინესოტასთან მატჩში მიიღო. ყველაზე მეტი, 6 ქულა კი ატლანტა ჰოუქსთან და ტორონტო რეპტორსთან ჩატარებულ შეხვედრებში ჩააგდო.
