"იმედია, დანაკლისი ძალიან არ დაგვეტყობა" - გურამ კაშიას პრესკონფერენცია

2026 წლის მსოფლიო ჩემპიონატის საკვალიფიკაციო ეტაპზე თურქეთთან გასამართი მატჩის წინ გურამ კაშიამ პრესკონფერენციაზე ისაუბრა.

„სანაკრებო შეკრებებზე დროში თითქმის ყოველთვის შეზღუდულები ვართ, მაგრამ ძალიან კარგ რაღაცებზე ვიმუშავეთ, ნაყოფიერი ვარჯიშები იყო, ტაქტიკური ვარჯიშები გვქონდა. კარგად ვიცით, თუ რა დავალება გვაქვს.

მახსოვს ევრო 2024-ზე მატჩი კარგად ჩავატარეთ. სამწუხარო იყო, რომ 3 გოლი გავუშვით, ამას არ ვიმსახურებდით. ახლა ვფიქრობ, მეტი თავდაჯერებით, რწმენითა და საკუთარ გულშემატკივართან ერთად ვითამაშებთ. ვეცდებით ქულები ავიღოთ, ესაა ჩვენი მიზანი.

ძალიან სამწუხაროა ასეთი ორი მნიშვნელოვანი ფეხბურთელის (კიტეიშვილი და ჩაკვეტაძე) დანაკლისი. ვიცით, რომ მათ გარეშე ძალიან გაგვიჭირდება, მაგრამ როგორც ვთქვი, ნაყოფიერი ვარჯიშები გვქონდა და იმედიანად ვართ განწყობილი. თუმცა, ყველამ იცის, კიტესთან ერთად სხვა გუნდი ვართ და მის გარეშე - სხვა. მიუხედავად ამისა, იმედია, რომ ეს დანაკლისი ძალიან არ დაგვეტყობა.

რა თქმა უნდა, რეალურად უნდა შევაფასოთ ეს ჯგუფი და ძალიან რთულია. ესპანეთი ვიცით, თუ როგორი ნაკრებია და რამდენად რთულია მასთან თამაში. ძალიან ბევრჯერ ვეთამაშეთ, მარტო მე 7-8-ჯერ ვეთამაშე და ყოველთვის ძალან რთული იყო. მასთან ქულების დაგეგმა ძალიან რთული იქნება, მაგრამ ეს ყველა ნაკრებს ეხება, რადგან ესპანეთს ყველასთან მოგება აქვს დაგეგმილი.

თუ მსოფლიოს ჩემპიონატზე მოხვედრა გინდა, თურქეთსა და ბულგარეთთან უნდა იბრძოლო. ეს თამაში იქნება ძალიან მნიშვნელოვანი და ამ ორ მატჩში გამოჩნდება რეალობა როგორია, გვინდა, თურქეთთან გავიმარჯვოთ, რადგან მათთან მოგება ჯგუფიდან გასვლის ერთადერთი შანსია. ამის მჯერა და მატჩის მერე უფრო მეტი გვეცოდინება.

გულშემატკივრებთან ჩემი მოწოდება უბრალოდ ის იქნება, რომ უგულშემატკივრონ გუნდს, როგორც აქამდე აკეთებდნენ. ბოლო წლებში სამაგალითო გულშემატკივარი გვყავს, განსაკუთრებით ქომაგები, რომლებიც ყოველთვის ბოლომდე გვიდგანან გვერდში.

არანაირი მოწოდება, უბრალოდ მხარში დაგვიდგნენ და ვეცდებით, რომ თამაშის მერე გავახაროთ. ვფიქრობ, ისინი ყოველთვის მოწოდების სიმაღლეზე არიან და ვთხოვ, რომ ასე გააგრძელონ." - თქვა საქართველოს ნაკრების კაპიტანმა.

საქართველოსა და თურქეთის მატჩი დინამო არენაზე, 4 სექტემბერს 20:00 საათზე გაიმართება.

"გუნდის მზადყოფნაში ეჭვი არ მეპარება" - სანიოლის პრესკონფერენცია