კოპა ამერიკა 2024-ზე დარჩენილი 1/4 ფინალური შეხვედრები გაიმართა.
პირველ მატჩში კოლუმბიამ მარტივად გაიმარჯვა და მომდევნო ეტაპზე გავიდა. მათი მეტოქე პანამა იყო. შეხვედრა ანგარიშით 5-0 დასრულდა.
კოლუმბიელებს ხამეს როდრიგესმა ულიდერა, რომელმაც 1 გოლი და 2 საგოლე გადაცემა მიითვალა. ხამესის ანგარიშზე ამ ტურნირზე უკვე 1 გოლი და 5 ასისტია.
დანარჩენი გოლები ჯონ კორდობამ. ლუის დიასმა, რიჩარდ რიოსმა და მიგელ ბორხამ გაიტანეს. განსაკუთრებით ლამაზი რიოსის გოლი გამოდგა, რომელმაც შორეული დარტყმით აიღო პანამელთა კარი.
კოლუმბიის მეტოქე ურუგვაისა და ბრაზილიის მატჩში გაირკვა. შეხვედრა საკმაოდ დაძაბული გამოდგა, რაც იმაშიც აისახა, რომ სულ 41 ჯარიმა ვიხილეთ. საბოლოოდ მატჩის გამარჯვებული ძირითად დროში ვერ გამოვლინდა და პენალტების სერიის დანიშვნა გახდა საჭირო, სადაც ურუგვაიმ იმარჯვა.
მოგებული გუნდიდან თავიანთი შანსი ვალვერდემ, ბენტანკურმა, დე არასკაეტამ და უგარტემ გამოიყენეს, ხიმენესმა კი პენალტი არაზუსტად შეასრულა.
ბრაზილიელთა მხრიდან კი პერეირამ და მარტინელიმ გაიტანეს თერთმეტმეტრიანები, მილიტაო და დუგლას ლუიზი კი თავიანთ გუნდს ვერ დაეხმარნენ და ბრაზილია კოპა ამერიკა 2024-ს გამოეთიშა.
ტურნირის პირველ 1/2 ფინალში მოქმედი ჩემპიონი არგენტინა კანადას დაუპირისპირდება, ურუგვაი კი კოლუმბიასთან გაარკვევს უძლიერესის ვინაობას.
არგენტინა - კანადა (10 ივლისი, 04:00)
ურუგვაი - კოლუმბია (11 ივლისი, 04:00)
1/2 ფინალური შეხვედრების წინ გათამაშების ბომბარდირად 4 გოლით ლაუტარო მარტინესი რჩება.
კოპა ამერიკა 15 ივლისს დასრულდება.
