საქართველოს ეროვნულმა ნაკრებმა ნოემბრის მატჩებისთვის მზადების ფარგლებში, საგურამოში დასკვნითი ვარჯიში გამართა. ვარჯიშამდე ოთარ კიტეიშვილმა მოახლოებული მატჩების შესახებ ისაუბრა.
"რამდენიმე დღეა რაც ვემზადებით ძალიან მნიშვნელოვანი თამაშებისთვის. ბოლო ორი დღეა შედარებით ინტენსიური ვარჯიშები გვქონდა, რომ მაქსიმალურ მზადყოფნაში შევხვდეთ მოახლოებულ შეხვედრებს. გაცნობიერებული გვაქვს, თუ რა მნიშვნელობის თამაშები გველის. ჯგუფის გადამწყვეტი ფაზაა და აუცილებელია მაქსიმალურად კარგი თამაშის ჩვენება დადებითი შედეგის მისაღწევად.
განსხვავებული მატჩები ჩავატარეთ. ოქტომბერში, უფრო მეტად დაცვიდან გვეთამაშებოდნენ მეტოქეები და ნაკლებ სივრცეს გვიტოვებდნენ. მსგავსი მოლოდინი გვაქვს მოახლოებულ შეხვედრებშიც, თუმცა უკრაინაც მოსაგებად იბრძოლებს, ჩვენ კი, ჩვენს თამაშზე უნდა ვკონცენტრირდეთ და ჩვენი ძლიერი მხარეები მაქსიმალურად გამოვიყენოთ". - კიტეიშვილის სიტყვებს ეროვნული ნაკრების გვერდი ციტირებს.
15 ნოემბერს, საქართველოს ნაკრები ბათუმში გაემგზავრება, სადაც აჭარაბეთ არენაზე მატჩისწინა ვარჯიშს გამართავს. მატჩი 16 ნოემბერს, 21:00 საათზე გაიმართება.
გადამწყვეტი 2 ტური - საქართველო პირველობისთვის იბრძვის
