საფეხბურთო სამყარო 2026 წლის მსოფლიო ჩემპიონატის მოახლოებასთან ერთად ძირითადად მოედანზე მიმდინარე მოვლენებზე, გაფართოებულ 48-გუნდიან ფორმატსა და მასპინძელ ქალაქებს შორის არსებულ უზარმაზარ დისტანციებზე ამახვილებს ყურადღებას.
ახალი დოკუმენტური სერიალის, Route ’26: Losing Sight of Goal-ის ავტორი, ალექს მანუპენი მიიჩნევს, რომ გულშემატკივრები უმთავრეს ფაქტორს ივიწყებენ, რამაც შესაძლოა მათზე ნებისმიერ ტაქტიკურ ბრძოლაზე მეტად მოახდინოს გავლენა. ეს ფაქტორი სიცხეა.
ალექსმა და ლორენს მაკკენამ, ორგანიზაცია Pledgeball-თან თანამშრომლობით, 5-ნაწილიანი დოკუმენტური სერიალი გადაიღეს, რომელიც ფეხბურთის, კლიმატისა და გულშემატკივართა გამოცდილების კვეთას იკვლევს. აშშ-ში მოგზაურობისას მათთვის ერთ-ერთი ყველაზე თვალსაჩინო გაჩერება ფენიქსი აღმოჩნდა.
მიუხედავად იმისა, რომ ფენიქსი მუნდიალის მასპინძელი ქალაქი არ არის, ის კარგად ასახავს იმ ეკოლოგიურ პირობებს, რაც ფანებს აშშ-ის სამხრეთ შტატებში ელოდებათ. მანუპენი დაესწრო ადგილობრივი გუნდის, ფენიქს რაიზინგის მატჩს, რომელიც საღამოს 7 საათზე დაიწყო, თუმცა ტემპერატურა კვლავ 39°C იყო.
ალექსმა აღნიშნა:
ეს თითქოს ღუმელში ყოფნას ჰგავს. ადამიანებს ჰგონიათ, რომ უბრალოდ ცოტათი უფრო თბილა, თუმცა ასე არ არის - საქმე სიცხის სიმშრალეშია. ჩემთვის პირველი შოკი იყო, როდესაც მითხრეს, რომ ფეხბურთელები მოედანზე გასახურებლად გავიდნენ. მეგონა, ვიღაც მეხუმრებოდა.
მანუპენის გაკვირვება ადგილობრივი ფანების რეაქციამაც გამოიწვია, რომლებიც ამ პირობებს ადაპტირებულები არიან, სვამენ ბევრ წყალს და იყენებენ გამაგრილებელ მოწყობილობებს. ევროპიდან თუ სამხრეთ ამერიკიდან ჩასულ გულშემატკივრებს, რომლებსაც მსგავს გარემოში წლების განმავლობაში ცხოვრების გამოცდილება არ აქვთ, სერიოზული პრობლემები შეექმნებათ.
მუნდიალის დროს ფანები დიდ დროს ატარებენ ღია ცის ქვეშ, გადაადგილდებიან ქალაქებს შორის, იკრიბებიან ფან-ზონებში და მოიხმარენ ალკოჰოლს, რაც ექსტრემალურ სიცხეში ორგანიზმისთვის კიდევ უფრო დიდ ფიზიკურ დატვირთვას ნიშნავს.
გადაღებებისას ექსპერტებმა რეჟისორებს სიცხის გავლენა განუმარტეს ადამიანის ფიზიოლოგიაზე, რაც გულ-სისხლძარღვთა გართულებებისა და ჯანმრთელობის სხვა პრობლემების რისკს ზრდის:
თუ თამაშები ასეთ სიცხეში ჩატარდება, ტაქტიკურ სქემებზე ან შემადგენლობებზე საუბარს აზრი ეკარგება. ყველაფერი მეორეხარისხოვანი ხდება, რადგან მთავარი ბრძოლა კლიმატთან მოგიწევს.
ავტორის თქმით, ფეხბურთი საუკეთესო პლატფორმაა იმისთვის, რომ ადამიანებმა კლიმატური ცვლილებების პრობლემა უფრო ახლოს მიიტანონ გულთან. როდესაც ტემპერატურის მატება გავლენას ახდენს მოთამაშეებზე, ფანებსა და მატჩების მიმდინარეობაზე, პრობლემა უფრო თვალსაჩინო ხდება.
