ქართული გუნდები ევროტურნირებზე ასპარეზობას იწყებენ

ევროპის ჩემპიონატის პარალელურად ფეხბურთში სტარტს იღებს ახალი სეზონი საკლუბო ფეხბურთშიც.

ამ კვირაში უეფას ჩემპიონთა ლიგის, ევროპა ლიგისა და კონფერენს ლიგის პირველი საკვალიფიკაციო ეტაპის მატჩები გაიმართება, სადაც ქართული გუნდებიც მიიღებენ მონაწილეობას.

საქმეში პირველი საქართველოს ჩემპიონი ბათუმის დინამო ჩაერთვება, რომელიც ჩემპიონთა ლიგის საკვალიფიკაციო ეტაპის პირველ რაუნდში ბულგარეთის ჩემპიონ რაზგრადის ლუდოგორეცს დაუპირისპირდება.

ბათუმელები პირველ მატჩს სტუმრად გამართავენ, შეხვედრა 10 ივლისს 22:00-ზე დაიწყება. განმეორებითი თამაში კი 17 ივლისს (21:00) ბათუმში, აჭარაბეთ არენაზე ჩატარდება.

11 ივლისიდან კი ასპარეზზე ქუთაისის ტორპედო და დინამო თბილისი შემოდიან, რომელიც კონფერენს ლიგის საკვალიფიკაციო ეტაპზე ჩაერთვებიან.

ქუთაისელები პირველ მატჩს რამაზ შენგელიას სახელობის სტადიონზე ალბანური ტირანას წინააღმდეგ გამართავენ (11 ივლისი, 21:00), 18 ივლისს კი განმეორებითი შეხვედრა  ალბანეთში შედგება (18 ივლისი, 22:00).

რაც შეეხება დინამო თბილისს, დედაქალაქელები პირველ მატჩს მონტენეგროში ადგილობრივი მორნარ ბარის წინააღმდეგ ჩაატარებენ (11 ივლისი, 22:45), 18 ივლისს კი გუნდების მეორე დაპირისპირებას დინამო არენა უმასპინძლებს (21:00).

კონფერენს ლიგის საკვალიფიკაციო ეტაპზე მონაწილეობას კიდევ ერთი ქართული გუნდი - იბერია 1999 მიიღებს, ოღონდ ისინი ასპარეზობას მეორე ეტაპიდან დაიწყებენ, სადაც მათი მეტოქე ალბანურ პარტიზანსა და მალტურ მარსაქსლოკს შორის გამარჯვებული იქნება.

წარმატებებს ვუსურვებთ ქართულ გუნდებს ევროასპარეზზე!