ქართული სპორტის საოცარი კვირა

გასული კვირა ქართული სპორტისთვის საოცარი გამოვიდა. ქართველმა სპორტსმენებმა თავიანთი კარგი პერფორმანსით გულშემატკივრები გაახარეს.

რა თქმა უნდა, ყველაზე დიდი მოვლენა მერაბ დვალიშვილის გამარჯვება იყო. The Machine-მა ქვემსუბუქი წონის ტიტულის მფლობელი შონ ო'მალი დაამარცხა და UFC-ის მეორე ქართველი ჩემპიონი გახდა.

საოცარი პერფორმანსი შემოგვთავაზა საქართველოს საფეხბურთო ეროვნულმა ნაკრებმა, რომელმაც ერთა ლიგის ახალი გათამაშება ორი მნიშვნელოვანი და სანახაობრივი გამარჯვებით დაიწყო. თბილისში ჩეხეთის დამარცხების შემდეგ ვილი სანიოლის გუნდმა ტირანაში ალბანეთსაც სძლია და 6 ქულით ჯგუფს ერთპიროვნულად უდგას სათავეში.

კლუბებში დაბრუნებულმა ფეხბურთელებმა თავი ინდივიდუალური შედეგებითაც გამოიჩინეს. ხვიჩა კვარაცხელიამ კალიარის წინააღმდეგ გოლი და საგოლე გადაცემა მიითვალა და სტატისტიკური ვებ-გვერდების მიხედვით ყველაზე მაღალი შეფასებაც დაიმსახურა.

კვარაცხელიამ სერია ა-ში 50-ე ქართული გოლი გაიტანა

საგოლე გადაცემა გააკეთა ლილის წინააღმდეგ ზურიკო დავითაშვილმა, რომელმაც ამ სეზონში სენტ-ეტიენის პირველ გამარჯვებაში დიდი წვლილი შეიტანა და ტურის თერთმეტეულშიც მოხვდა.

დავითაშვილი ლიგა 1-ის ტურის სიმბოლურ გუნდში მოხვდა

შთამბეჭდავ თამაშს აგრძელებს გერმანიის მეორე ბუნდესლიგაში ბუდუ ზივზივაძე, რომელმაც შალკეს დუბლი შეუსრულა და კარლსრუეს მოაგებინა. ქართველი თავდამსხმელი სიმბოლურ გუნდშიც მოხვდა და ბომბარდირთა დავასაც 6 გოლით ერპიროვნულად ლიდერობს.

სამი ვერსიით - ზივზივაძე მეორე ბუნდესლიგის კვირის გუნდში

ინგლისის ჩემპიონშიფში მორიგი საგოლე მოქმედება მიითვალა გიორგი ჩაკვეტაძემ, რომელმაც ქოვენთრის წინააღმდეგ ასისტი ჩაიწერა აქტივში. ჩაკვემ მატჩის მიმდინარეობისას ტრავმა მიიღო და გულშემატკივრებიც აანერვიულა, თუმცა ცუდი მოლოდი არ გამართლდა და ყველაფერი კარგადაა.

არანაირი მუხლის ტრავმა! გიორგი ჩაკვეტაძის ჯანმრთელობის მდგომარეობა გაირკვა

იტალიის სერია ა-ში მე-2 მატჩი გამართა ახალგაზრდა ქართველმა მცველმა საბა გოგლიჩიძემ, რომელსაც იუვენტუსის წინააღმდეგ ნდობა გამოუცხადეს. ემპოლიმ ბიანკონერისთან უგოლო ფრე ითამაშა, გოგლიჩიძემ კი სადებიუტო შეხვედრის მსგავსადაც კარგად ითამაშა და იუვენტუსის შემტევებს გასაქანი არ მისცა.

საბა გოგლიჩიძის ტოპ-მატჩი იუვენტუსთან, მოპოვებული ქულა და მაღალი შეფასება

ესპანეთის ლა ლიგა 2-ში თავი გამოიჩინა გიორგი წიტაიშვილმა, რომელმაც ელჩეს წინააღმდეგ საგოლე გადაცემა გააკეთა.

ქართველ სპორტსმენებს როგორც ინდივიდუალურად ისე სანაკრებო დონეზე მართლაც საოცარი კვირა გამოუვიდათ, რაც ნამდვილად სასიხარულო ფაქტია.