რეკორდსმენი იამალი და შამათი რაბიოს

ევრო 2024-ის პირველ 1/2 ფინალურ შეხვედრაში ესპანეთის ნაკრებმა საფრანგეთი 2-1 დაამარცხა და ევროპის ჩემპიონატის ფინალში გავიდა.

ევრო 2024 - ფურია როხას დამაჯერებელი სვლა გრძელდება, პირველი ფინალისტი გაირკვა

ესპანელთა მხრიდან გამათანაბრებელი გოლი ლამინ იამალმა გაიტანა, რომლითაც ის ყველა დროის რეკორდსმენი გახდა.

იამალი 16 წლის ასაკში ისტორიაში ყველაზე ახალგაზრდა მოთამაშეა, რომელმაც ევროპის ჩემპიონატზე გოლის გატანა შეძლო.

ახალგაზრდა ვარსკვლავს მიმდინარე ტურნირზე 1 გოლთან ერთად 3 საგოლე გადაცემაც აქვს შესრულებული.

იამალისთვის ეს გოლი სხვა მხრივაც იყო მნიშვნელოვანი და პრინციპული.

მატჩის წინ საფრანგეთის ნაკრების ნახევარმცველმა ადრიენ რაბიომ ახალგაზრდა ესპანელზე განაცხადა: "დიდ ტურნირზე მისთვის 1/2 ფინალის თამაში რთული იქნება. ფინალში გასასვლელად, მას იმაზე მეტის გაკეთება სჭირდება, ვიდრე აქამდე აკეთებდა."

ფრანგის განცხადების შემდეგ იამალმა სოციალურ ქსელში სთორი განათავსა: "იმოძრავე სიჩუმეში და მხოლოდ მაშინ ისაუბრე, როცა შამათი გაქვს სათქმელი."

მატჩის დასრულების შემდეგ გახარებულმა ლამინმა, რომელიც შეხვედრის საუკეთესო მოთამაშედაც დასახელდა, კამერაში დაიძახა: "ახლა ილაპარაკე!"

იამალი და ესპანეთი ფინალში არიან, რაბიო და საფრანგეთი კი ტურნირს დაემშვიდობნენ.

ფურია როხა ფინალში ნიდერლანდებისა და ინგლისის ნაკრებებს შორის გამარჯვებულს დაელოდება.