როგორია რონალდუ დახურულ კარს მიღმა?

ესპანელმა მცველმა, ალვარო გონსალესმა, რომელიც კრიშტიანუ რონალდუსთან ერთად საუდის არაბეთში (ალ-ნასრი) თამაშობდა, Radio MARCA-ს ეთერში პორტუგალიელის შესახებ უცნობი დეტალები გაამჟღავნა.

მისი თქმით, რონალდუს მიმართ გავრცელებული სტერეოტიპების მიუხედავად, ის რეალურ ცხოვრებაში სრულიად განსხვავებული ადამიანია:

მოედანზე ის ნამდვილი კონკურენტუნარიანი მხეცია, მაგრამ როგორც კი გასახდელში შედის, სრულიად იცვლება. ის სუპერ ნორმალური, თავმდაბალი და კონტაქტური ადამიანია, რომელიც ყოველთვის გეხმარება. გუნდში ჩამოსვლისთანავე ყველაფერში გვერდით დაგვიდგა

გონსალესმა კრიშტიანუსთან ერთად ვარჯიშებიც გაიხსენა და აღნიშნა, რომ პორტუგალიელი საუდის არაბეთშიც იმავე მაღალ სტანდარტებს ითხოვს, რასაც ევროპაში. ესპანელმა ხუმრობით ისიც დასძინა, რომ ვარჯიშებზე რონალდუს წყობიდან გამოყვანას ხშირად ცდილობდა:

ვარჯიშებზე მისთვის ნერვების მოშლას ყოველთვის ვცდილობდი. ის მკვლელი მზერით მიყურებდა... თუმცა, შემდეგ ჯაკუზიში ჩავიდოდით, ვიცინებდით და ყველაფერი გვავიწყდებოდა. მას სურს, რომ ვარჯიშებზეც კონკურენტუნარიანები ვიყოთ. კრიშტიანუს მთავარი ჰორიზონტი ახლა 1000 გოლის გატანაა და ამისთვის მუშაობას აგრძელებს