ბორუსია დორტმუნდმა ოფიციალურად დაადასტურა ინტერესი ჯეიდონ სანჩოს ხელახლა გაფორმებასთან დაკავშირებით. მისი კონტრაქტი მანჩესტერ იუნაიტედთან ივნისში იწურება. ბუნდესლიგის გიგანტები 26 წლის ვინგერის მესამედ დაბრუნებას განიხილავენ, თუმცა ამისათვის შემტევს ხელფასის საგრძნობლად შემცირება მოუწევს.
გერმანული კლუბი სერიოზულად განიხილავს ინგლისის ნაკრების ფეხბურთელის სიგნალ იდუნა პარკზე დაბრუნებას პრემიერ ლიგაში გატარებული რთული პერიოდის შემდეგ. ამჟამად ასტონ ვილას რიგებში იჯარით მყოფი სანჩოს კარიერა იუნაიტედში სრულდება - ოლდ ტრაფორდზე მისი 73-მილიონიანი ტრანსფერიდან ხუთი წლის შემდეგ. მიუხედავად ინგლისში არასტაბილური თამაშისა, დორტმუნდის ხელმძღვანელობა ოპტიმისტურადაა განწყობილი და სჯერათ, რომ ნაცნობი გარემო ვინგერს ფორმის აღდგენაში დაეხმარება.
დორტმუნდის ოფიციალურმა პირებმა განაცხადეს, რომ ზაფხულის სატრანსფერო ფანჯრისთვის პოტენციურ კანდიდატებს ყურადღებით აკვირდებიან და სანჩოს სახელი სამიზნეების სიის სათავეშია. მიუხედავად იმისა, რომ კლუბს მისი დაბრუნება სურს, Sky Germany-ს ცნობით, ფინანსური მხარე კვლავ მთავარ დაბრკოლებად რჩება, რადგან ფეხბურთელის წლიური ხელფასი ამჟამად 15 მილიონს შეადგენს.
კლუბის სატრანსფერო სტრატეგიასა და ვინგერის მიმართ ინტერესზე საუბრისას, დორტმუნდის მმართველმა დირექტორმა, ლარს რიკენმა SPORT BILD-ს განუცხადა:
ჩვენ ამჟამად ბევრ მოთამაშეს ვაკვირდებით და მათ დეტალურ ანალიზს ვაკეთებთ. ვამოწმებთ, შეუძლიათ თუ არა მათ ჩვენი გაძლიერება. იმავეს ვაკეთებთ ჯეიდონის შემთხვევაშიც.
სანჩოს გზა 2021 წელს გუნდიდან წასვლის შემდეგ სავსე იყო სირთულეებით. იუნაიტედში გადასვლა, რომელსაც თავად ახდენილ ოცნებად ახასიათებდა, ახლა წარუმატებლად სრულდება. იუნაიტედში გატარებული მძიმე ორი წლის შემდეგ, მან დორტმუნდში იჯარის დროს კარგი შთაბეჭდილება დატოვა, თუმცა შემდგომ ჩელსიში კვლავ იმედგაცრუება მოჰყვა. მისი ამჟამინდელი იჯარა ასტონ ვილა რიგებში ასევე არ მიდის სახარბიელოდ - 26 წლის ფეხბურთელმა მიმდინარე სეზონში ჩატარებულ 31 მატჩში (აქედან მხოლოდ 17 სასტარტოში) მხოლოდ ერთი გოლი და სამი საგოლე გადაცემა მიითვალა.
