საქართველოს ნაკრების მთავარმა მწვრთნელმა ვილი სანიოლმა 2026 წლის მსოფლიო ჩემპიონატის საკვალიფიკაციო ეტაპზე ესპანეთის ნაკრებთან 0-4 წაგებული მატჩის შემდეგ პრესკონფერენცია გამართა.
“მატჩის შედეგი ბევრ რამეზე მეტყველებს. დაცვაში ბევრი მუშაობა მოგვიწევს. ახალი დაცვის ხაზს ვაშენებთ და ბევრი მუშაობაა საჭირო. ოქტომბრისგან განსხვავებით, ახლა დადებითი მომენტი გამოჩნდა.
კარგები ვიყავით ბურთით და შედარებით უკეთ გამოვიყურებოდით შეტევების ორგანიზების დროს. მთავარი ჩემთვის ისაა, რომ ბიჭებმა ბოლომდე იბრძოლეს, მომავლისთვის, ეს მნიშვნელოვანია. თუმცა, როცა ასეთი გუნდის წინააღმდეგ თამაშობ, დაცვაში შეცდომები მინიმუმამდე უნდა დაიყვანო.
რამდენიმე მოთამაშემ თავისი რესურსი ამოწურა, ცვლილებები საჭიროა, განსაკუთრებით დაცვის ხაზში. მე არ მგონია, რომ ვინმე სხვა უფრო სწრაფად მოახერხებს ამის შეცვლას.
5 წელი გავიდა, კარგად მიცნობთ, ტყუილად ლაპარაკი არ მიყვარს. მუდმივად ვსაუბრობ იმ პრობლემებზე, რაც გვაქვს. ძლიერი დაცვის ხაზის შექმნას დრო სჭირდება, ეს სწრაფად ვერ მოხერხდება. მარტში უკეთესი გუნდი ვიქნებით, სექტემბერში კი ბევრად უკეთეს ნაკრებს ნახავთ.
ცვლილებები აუცილებლად იქნება. ბერიაშვილს რაც შეეხება, ის ბულგარეთთან მატჩისთვის უკვე გამოვიძახეთ. მას ერთი საათის წინ დავუკავშირდით და ნაკრებს ბულგარეთში შეურთდება.
დე ლა ფუენტესთან კარგი ურთიერთობა მაქვს. მას ვუთხარი, რომ იმედია, ეს მის წინააღმდეგ ჩატარებული ბოლო მატჩია. თუ მის წინააღმდეგ კიდევ მომიწევს თამაში, პოსტს დავტოვებ.
როგორ ფეხბურთსაც თამაშობს ესპანეთი, წარმოუდგენელია. ასეთი ფეხბურთის თამაში ძალიან რთულია. იმედია, ერთ დღეს საქართველოს ნაკრებიც ითამაშებს მსგავს ფეხბურთს. ბევრი კომპლიმენტი მაქვს მის მიმართ.
0:4 ესპანეთთან - ნაკრებმა წლის ბოლო საშინაო მატჩი დიდი ანგარიშით წააგო
