საქართველოს ეროვნულმა საკალათბურთო ნაკრებმა 2027 წლის მსოფლიო ჩემპიონატის საკვალიფიკაციო ტურნირისთვის მზადების პროცესი დაიწყო.
ალექსანდარ ჯიკიჩის გაწვრთნილ გუნდს პირველი საკვალიფიკაციო ეტაპის ბოლო 2 მატჩი ელის: 2 ივლისს უკრაინასთან (ლატვიაში) და 5 ივლისს ესპანეთთან (თბილისში).
მიუხედავად იმისა, რომ ნაკრებს მომდევნო ჯგუფური ეტაპის საგზური უკვე განაღდებული აქვს, ამ შეხვედრების მოგებას მაინც უდიდესი მნიშვნელობა ენიჭება.
აქ დაგროვილი ქულები გუნდებს მე-2 რაუნდშიც გადაჰყვებათ, სადაც კიდევ 6 მატჩი ელით და სწორედ ამ ჯამური შედეგით გაირკვევა, მოიპოვებენ თუ არა მსოფლიო ჩემპიონატის საგზურს.
ეროვნული გუნდის მთავარმა მწვრთნელმა 19-კაციანი გაფართოებული შემადგენლობა დაასახელა.
აღსანიშნავია, რომ გუნდს აღნიშნულ მატჩებში NBA-ის ქართველები სანდრო მამუკელაშვილი (ტორონტო რეპტორსი) და გოგა ბითაძეც (ორლანდო მეჯიქი) დაეხმარებიან.
ოფიციალურ მატჩებამდე საქართველოს ნაკრები 2 ამხანაგურ შეხვედრას გამართავს:
24 ივნისი (იურმალა): საქართველო – ანგოლა
28 ივნისი (რიგა): საქართველო – ლატვია
ამჟამად მიმდინარე ჯგუფში სიტუაცია ასეთია:
4-დან 4 მოგებით ცხრილის სათავეში ესპანეთია. მათ 2-2 გამარჯვებით უკრაინა და საქართველო მიჰყვებიან, ხოლო ბოლო პოზიციას დანია იკავებს, რომელსაც არცერთი მოგება არ აქვს.
ესპანეთსა და საქართველოს მე-2 ეტაპის საგზური უკვე განაღდებული აქვთ, დიდი ალბათობით კი მათ უკრაინაც შეუერთდება.
მე-2 ჯგუფურ ეტაპზე ნაკრებები მხოლოდ იმ მეტოქეებს დაუპირისპირდებიან, რომლებსაც მანამდე არ შეხვედრიან.
საბოლოო ჯამში, ამ ახალი ჯგუფების 3-3 საუკეთესო გუნდი მსოფლიო ჩემპიონატის საგზურს მოიპოვებს.
