"ტოპ კლასია, მასთან ერთად გუნდი სხვა განზომილებით თამაშობს" - ბარსას მწვრთნელი თოკოზე

თორნიკე შენგელიამ, ევროლიგის მე-20 ტურში, მაკაბი თელ-ავივის წინააღმდეგ ტოპ მატჩი ჩაატარა და ბარსელონას გამარჯვებაში (93:83) მთავარი როლი ჰქონდა.

ქართველის გუნდში როლზე გაამახვილა ყურადღება ბარსას მთავარმა მწვრთნელმა, ჩავი პასკუალმა.

"ის ერთ-ერთი ყველაზე მნიშვნელოვანი მოთამაშეა, ვინც გვყავს. ტოპ კლასის კალათბურთელია და ბედნიერები ვართ, რომ დაგვიბრუნდა. ძალიან გვაკლდა. მასთან ერთად, გუნდი სხვა განზომილებით თამაშობს".

თამაშის შემდეგ, ევროლიგის ოფიციალურ ვებგვერდთან გაისაუბრა თავად თოკომაც.

"ჩემთვის დაბრუნება ძალიან მნიშვნელოვანია, თანდათან უკეთეს ფორმაში შევდივარ. 

მაკაბი არის გუნდი, რომელიც არასდროს ნებდება და იმ მომენტებშიც კი, როცა წინ გავდიოდით, მუდმივად ახლო დისტანციის შენარჩუნებას ახერხებდნენ, რის გამოც 40-ვე წუთის განმავლობაში სრული კონცენტრირება დაგვჭირდა. მნიშვნელოვანი გამარჯვება მოვიპოვეთ".

შენგელიამ მაკაბისთან 25:12 წუთში 22 ქულა, 2 მოხსნა და 4 ასისტი მიითვალა. 9-დან 7 სროლა გამოიყენა - 7-დან 6 ორქულიანი და 2-დან 1 სამქულიანი, ასევე 7-დან 7 საჯარიმო ჩააგდო. ეფექტიანობის ინდექსით, ორივე გუნდში საუკეთესო იყო - 27.

ქულების მხრივ, წლევანდელ სეზონში ჩატარებული 27 მატჩიდან ამაზე უფრო კარგი მაჩვენებელი ერთადერთხელ ჰქონდა - 31 ოქტომბერს, ევროლიგის ეგიდით, ბელგრადის პარტიზანთან (24 ქულა, 5 მოხსნა, 5 ასისტი).

ბარსა ევროლიგის მომდევნო ტურში, 9 იანვარს, სწორედ ბელგრადის პარტიზანს მასპინძლობს.