ცარუკიანი თოფურიას: "შენს სახლს ვიყიდი, თუ ჩემთან ჩხუბს დათანხმდები"

არმან ცარუკიანს ილია თოფურიასთან საჩემპიონო ქამრისთვის ბრძოლის გამართვა სურს.

როგორც იცით, რამდენიმე თვიანი პაუზის შემდეგ, ოქტაგონზე დაბრუნებულ ილიას საჩემპიონო ქამრის დაცვა დროებითი ჩემპიონის, ჯასტინ გეიჯის წინააღმდეგ მოუწევს.

გუშინ გავრცელდა ინფორმაცია, რომ თოფურია მადრიდში თავის სახლს 3.5 მილიონ დოლარად ყიდის, რომელთან ერთადაც თავის აწ უკვე ყოფილ მეუღლესთან, ჯეორჯინასთან ერთად ცხოვრობდა.

შენს სახლს ვიყიდი

„შენს სახლს ვიყიდი, თუ ჩემთან ჩხუბს დათანხმდები." — ასე მიმართა ცარუკიანმა თოფურიას სოციალურ ქსელ X-ში, რომელიც ადრე Twitter-ით იყო ცნობილი.

საჩემპიონო ქამრისთვის ბრძოლის შანსი არმან ცარუკიანს 2024 წლის იანვარში ჰქონდა, როცა ისლამ მახაჩევთან ჩაუნიშნეს ბრძოლა, თუმცა მან 2 დღით ადრე გამოაცხადა, რომ ოქტაგონზე გასვლას ზურგის ტრავმის გამო ვერ მოახერხებს. თუმცა, არსებობს ვარაუდი, რომ სომეხმა მებრძოლმა წონა ვერ ჩააბარა.

მას შემდეგ, UFC-ის პრეზიდენტმა დანა უაითმა არაერთხელ აღნიშნა, რომ ცარუკიანზე გაბრაზებულია, რომ მან თავისი შანსი გაუშვა ხელიდან და ახლა საჩემპიონო ბრძოლის ხელახლა მოსაპოვებლად დიდი შრომა მოუწევს.

ოქტაგონზე ვერ გასვლის შემდეგ — მახაჩევთან ბრძოლაში ის ბრაზილიელმა რენატო მოიკანომ ჩაანაცვლა — ცარუკიანმა UFC-ში მხოლოდ ერთი ბრძოლა ჩაატარა, როცა 2025 წლის მიწურულს დენ ჰუკერი მეორე რაუნდში მახრჩობელა ილეთით დაამარცხა.