VIDEO: გუნდში მე-3 შედეგი ლიდერის წინააღმდეგ - მამუს ტორონტო დეტროიტში დამარცხდა

სანდრო მამუკელაშვილის ტორონტო რეპტორსმა აღმოსავლეთ კონფერენციის ლიდერ დეტროიტ პისტონსთან გასვლითი მატჩი წააგო - 116:127.

წინა შეხვედრის მსგავსად, მამუს, ქულების მხრივ, თავის გუნდში მე-3 შედეგი ჰქონდა - 16 ქულა, 6 მოხსნა, 2 ასისტი. ასევე, 1-1 ჩაჭრა და დაკარგვაც. 9-დან 5 ორქულიანი და 4-დან 2 სამქულიანი ჩააგდო. პარკეტზე 22:01 წუთი გაატარა.

მამუკელაშვილი ბოლო დროს კარგ ფორმაში და შედეგიანია - ორლანდოსთან 19 ქულა, 4 მოხსნა, 3 ასისტი მიითვალა, ნიუ ორლეანს პელიკანსთან 18 ქულა, 9 მოხსნა, 2 ასისტი მიითვალა, კლიპერსთან 13 ქულა, 7 მოხსნა მიითვალა, ხოლო იქამდე იუტასთან კარიერის მე-4 ყველაზე შედეგიანი შეხვედრა ჩაატარა (23 ქულა, 4 მოხსნა, 2 ასისტი).

75 თამაშის შემდეგ, რეპტორსს 42 მოგება აქვს, აღმოსავლეთ კონფერენციის მე-6 ადგილზე დაეშვა და მე-7 ადგილოსან ფილადელფიას 1 მოგებით უსწრებს.

დარკო რაიაკოვიჩის გუნდი მომდევნო შეხვედრას, 2 აპრილის 04:00 საათზე, დასავლეთ კონფერენციის ბოლოადგილოსან საკრამენტო კინგსთან შინ გამართავს.