VIDEO: ინდექსით მე-2 საუკეთესო - შენგელიას ბარსამ ახალ წელს ზედიზედ მეოთხედ მოიგო

თორნიკე შენგელიას ბარსელონა 2026 წელს გამარჯვებებით იწყებს და ზედიზედ მე-4 თამაში მოიგო - ევროლიგის 21-ე ტურში, ბელგრადის პარტიზანს 88:70 აჯობეს.

საინტერესოა, რომ სერბულ გრანდს ბარსადან ნოემბერში გაშვებული ხოან პენაროია წვრთნის და კატალონიის მთავარ ქალაქში დაბრუნება წარუმატებელი გამოუვიდა.

რაც შეეხება თოკოს, 3-კვირიანი ტრავმის შემდეგ, მისი სათამაშო დრო ნელ-ნელა იზრდება - პარკეტზე 27:40 წუთი გაატარა და საკუთარ გუნდს 13 ქულა, 2 მოხსნა და 3 ასისტი შესძინა. მისმა ეფექტიანობის ინდექსმა 19 შეადგინა, რაც მხოლოდ მატჩის MVP-ის, ვილი ერნანგომესის შედეგს (22) ჩამორჩება.

შეგახსენებთ, ქართველს შუა კვირაში მაკაბი თელ-ავივთან შესანიშნავი თამაში ჰქონდა და MVP თავად გახდა.

ბარსელონამ ევროლიგაზე 14 გამარჯვება მოაგროვა და ტურნირს ვალენსიასთან, მონაკოსთან და ჰაპოელ თელ-ავივთან ერთად ლიდერობს (ჰაპოელს თამაშით ნაკლები აქვს).

შენგელიას გუნდი 11 იანვარს ჩემპიონატში ბექა ბურჯანაძის გრანადას უმასპინძლებს, 16 რიცხვში კი, უკვე ევროლიგის ეგიდით, რეალ მადრიდს ესტუმრება.