VIDEO: მამუ უქულოდ დარჩა - ტორონტომ ფილადელფიას ოვერტაიმში 1 ქულით მოუგო

სანდრო მამუკელაშვილმა NBA-ის რეგულარულის მიმდინარე სეზონში ერთ-ერთი უსუსტესი პირადი პერფორმანსი აჩვენა. მისმა ტორონტო რეპტორსმა ფილადელფიას ოვერტაიმით მოუგო - 116:115.

კანადელთა მხრიდან სკოტი ბერნსი გამოირჩა - 31 ქულა, 7 მოხსნა, 8 ასისტი, ხოლო კოლინ მარეი-ბოილსს ორმაგი დუბლი ჰქონდა - 17 ქულა, 15 მოხსნა, 3 ასისტი.

რაც შეეხება სანდროს, პარკეტზე გატარებულ 18:08 წუთში ქულა არ აუღია და აქტივში მხოლოდ 1 მოხსნა, 2 ასისტი ჩაიწერა. 

მიმდინარე სეზონში მე-3 შემთხვევაა, როცა მამუ მინიმუმ 10 წუთს თამაშობს და ქულას ვერ აგროვებს - მემფისთან (3 ნოემბერი), დენვერთან (1-ელი იანვარი) და ფილადელფიასთან (11 იანვარი).

რეპტორსმა ერთ-ერთ უშუალო კონკურენტთან მნიშვნელოვანი და პრინციპული თამაში მოიგო, 24 გამარჯვება მოაგროვა და აღმოსავლეთ კონფერენციის მე-2 ადგილოსან ნიუ იორკ ნიქსს 1 მოგებით ჩამორჩება.

13 იანვრის 04:30 საათზე, მამუს გუნდი ისევ ფილადელფიას და ისევ საკუთარ დარბაზში შეხვდება.