VIDEO: გიჟური მატჩი მექსიკაში - მეკარე რამოსს პენალტის დროს ზურგით დაუდგა

მექსიკის ჩემპიონატში გიჟური მატჩი გაიმართა. ტიგრესმა საკუთარ მოედანზე მონტერეი მიიღო.

განსაკუთრებით გამორჩეული შეხვედრის მეორე ტაიმი გამოვიდა. 47-ე წუთზე მასპინძლები კაცნაკლული დარჩნენ და მათ კარში პენალტი დაინიშნა.

მსაჯმა დიეგო ლაინესს მეორე ყვითელი ბარათი უჩვენა, თერთმეტმეტრიანის შესასრულებლად კი სერხიო რამოსი მივიდა ბურთთან.

აქ კი იშვიათი რამ ვიხილეთ. კარის ხაზზე მდგომმა ტიგრესის არგენტინელმა მეკარემ, ნაჰუელ გუზმანმა ლეგენდარულ ესპანელ მცველს ზურგი შეაქცია და ასე ცდილობდა მისთვის ხელის შეშლას თუ გაღიზიანებას. ამის მიუხედავად რამოსმა გოლის გატანა მაინც შეძლო და ანგარიში გახსნა.

73-ე და 78-ე წუთებზე მონტერეის მოთამაშეებმა ხერმან ბერტერამემ და ოლივერ ტორესმა წითელი ბარათები მიიღეს და სტუმარი გუნდი 9 კაცით დარჩა, ამის შემდეგ კი მათ ანგარიშის შენარჩუნება გაუჭირდათ.

საბოლოდ მატჩის ბოლო წუთებში (89, 90+5) ტიგრესმა 2 გოლის გატანა შეძლო და 3 ქულა მოიპოვა.

რამოსის პენალტი (5:00)