ვიდეო: მორიგი ქამბექი, ტკივილგამაყუჩებლები და ბურუსით მოცული მეოთხედფინალი - ნოვაკი ჩაეხსნება?

როლან გაროსის მე-4 წრეში ნოვაკ ჯოკოვიჩმა მორიგი ხუთსეტიანი თრილერი გამოიარა.

მსოფლიო პირველი ნომრის მეტოქე არგენტინელი ფრანსისკო სერუნდოლო იყო, რომელიც ნოვაკის წინააღმდეგ კორტზე თავის კარიერაში პირველად გავიდა.

პირველი სეტი სერბის გამარჯვების 6:1 დასრულდა, თუმცა მეორეს დასაწყისში ნოვაკმა მუხლის ტკივილი იგრძნო და ექიმის დახმარება დასჭირდა. ამის შემდეგ, ინიციატივა სერუნდოლოს ხელში გადავიდა, რომელმაც მეორე სეტი 7:5 მოიგო, მესამე 6:3 და მეოთხეში თითქოს გადამწყვეტი ბრეიკიც შეასრულა - 4:2. თუმცა, ამის შემდეგ ნოვაკმა გადამწყვეტ მომენტში მოუმატა, მეოთხე სეტი 7:5 დახურა და საქმე გადამწყვეტში გადაიყვანა.

დისაიდერში საბოლოო უპირატესობა ჯოკოვიჩმა 4:3-ზე მოიპოვა, როცა მეტოქის მოწოდება მოიგო და 5:3-ზე მატჩზე წარმატებით მოაწოდა. 6:1 5:7 3:6 7:5 6:3 ოთხ საათსა და 37 წუთში, ნოვაკ ჯოკოვიჩი ზედიზედ მეორე მატჩში აქამბექებს სეტებში 1:2-დან და უმძიმეს ბრძოლაში ახერხებს შემდეგი ეტაპის საგზურის მოპოვებას.

შემდეგ წრეში როლან გაროსის მოქმედი ჩემპიონის მეტოქე ნორვეგიელი კასპერ რუუდი იქნება, რომელმაც ამერიკელი ტეილორ ფრიცი ოთხ სეტში დაამარცხა. სხვათაშორის, ეს შარშანდელი ფინალის გამეორება იქნება - მაშინ, ნოვაკმა დამაჯერებელი გამარჯვება მოიპოვა.

დღეს სხვა რეალობაა: სერბი იმასაც კი ამბობს, რომ არ იცის, გამოვა თუ არა ამ თამაშზე.

"ბევრი ტკივილგამაყუჩებელი დამჭირდა, რომლებმაც მეოთხე სეტის ბოლოს იმოქმედა. არ ვიცი ვითამაშებ თუ არა მეოთხედფინალს, უშუალოდ მატჩის წინ უფრო მეცოდინება." - აღნიშნა სერბმა პრესკონფერენციაზე.

სხვა მეოთხე წრის მატჩში ალექსანდრ ზვერევმა ზედიზედ მეორე ხუთსეტიან ბრძოლაში მოახერხა გამარჯვება - ამჯერად მან დანიელი ჰოლგერ რუნეს ბარიერი დაძლია და მეოთხედფინალში გავიდა.