ნიკოლოზ ბასილაშვილმა ბრიუსელის 250-ქულიანი ტურნირის ძირითად ბადეში მოხვედრასთან ერთ ნაბიჯშია. ქართველმა ჩოგბურთელმა საკვალიფიკაციო ეტაპის 1/2 ფინალში ბელგიელ ალესიო ბასილეს 6:4; 6:4 მოუგო.
ნიკას 5 ეისი ჰქონდა და ორმაგი შეცდომა არ დაუშვია. პირველი ბურთი 45 მცდელობიდან 31-ჯერ მოაწოდა (69%), ამ 31-დან 26 ქულა მოიგო, ხოლო მეორე მოწოდებაზე გათამაშებული 14-დან 9 ქულა დაასრულა თავის სასარგებლოდ. 4 ვინერსი ჰქონდა, ხოლო უნებლიედ 9-ჯერ შეცდა. 3 ბრეიკი შეასრულა, საკუთარი მოწოდება კი ერთხელ დათმო.
ბასილაშვილი, რომელიც ამჟამად მსოფლიოს მე-100 ჩოგანია, კვალიფიკაციის ფინალში გამოცდილ ფრანგ პიერ-უგო ერბერს (ATP-ის 142-ე ნომერი) შეხვდება. მასთან კარიერაში არასდროს უთამაშია.
