adjarabetarena-ზე ვაგრძელებთ ევრო 2024-ის მონაწილე გუნდების გაცნობას. დღეს ხორვატიის ნაკრების ჯერია.
ხორვატები საკვალიფიკაციო ეტაპზე თურქეთის, უელსის, სომხეთისა და ლატვიის ნაკრებებთან ერთად იყვნენ. მათ ჯგუფში 16 ქულით მე-2 ადგილი დაიკავეს და ევროპის ჩემპიონატის საგზური მოიპოვეს. გუნდმა ორი თამაში დათმო - ერთი უელსთან (2-1), ერთი კი თურქეთთან (0-1).
ხორვატიამ ორი ამხანაგური მატჩი მარტში გამართა ტუნისისა (0-0) და ეგვიპტის (2-4 გამარჯვება) ნაკრებებთან.
მთავარმა მწვრთნელმა ზლატკო დალიჩმა უკვე დაასახელა 26-კაციანი განაცხადი ევროპის ჩემპიონატის წინ.
არსებული შემადგენლობის ჯამური ღირებულება 331 მილიონი ევროა. ყველაზე ძვირადღირებული მოთამაშეები კი იოშკო გვარდიოლი (75 მილიონი ევრო), მატეო კოვაჩიჩი (30 მილიონი ევრო) და ლოვრო მაიერი (25 მილიონი ევრო) არიან.
გუნდის ყველაზე დიდი ლეგენდა და გამოცდილი მოთამაშე, რა თქმა უნდა, კაპიტანი ლუკა მოდრიჩია, რომელსაც ეროვნულ ნაკრებში 174 მატჩი აქვს ჩატარებული, მას მოჰყვებიან ივან პერიშიჩი (129 მატჩი) და დომაგოი ვიდა (104 მატჩი).
არსებულ განაცხადში ყველაზე მეტი გოლი ნაკრების მაისურით ივან პერიშიჩს (33 გოლი), ანდრეი კრამარიჩს (28 გოლი) და ლუკა მოდრიჩს (24 გოლი) აქვთ გატანილი.
ხორვატია ევროპის ჩემპიონატებზე მონაწილეობას 1996 წლიდან იღებს, როგორც დამოუკიდებელი ქვეყანა. მათ მას შემდეგ ყველა ტურნირზე ითამაშეს, გარდა ერთისა (2000 წელი).
ნაკრების საუკეთესო შედეგი ევროებზე 1/4 ფინალში გასვლაა. 1996 წელს ხორვატებმა გერმანიასთან წააგეს, 2008 წელს კი თურქეთთან. ბოლო ტურნირზე კი გუნდი ესპანეთის ნაკრებთან დამარცხდა დრამატულ ბრძოლაში (3-5).
ევროპის ჩემპიონატებზე ხორვატიის ნაკრებში ყველაზე მეტი მატჩი (13) ლუკა მოდრიჩს აქვს ჩატარებული, რომლისთვისაც მომავალი ტურნირი მე-5 ევრო იქნება.
გუნდის საუკეთესო ბომბარდირი კი კონტინენტის პირველობაზე ივან პერიშიჩია 4 გოლით.
ზლატკო დალიჩის გუნდის მეტოქეები ჯგუფურ ეტაპზე ესპანეთის, იტალიისა და ალბანეთის ნაკრებები იქნებიან.
ესპანეთთან სტატისტიკა ასეთია - 10 მატჩი, 3 მოგება, 1 ფრე, 6 წაგება. ბოლო მატჩი 2023 წლის ივნისში ერთა ლიგის ფინალში შედგა, სადაც ესპანელებმა პენალტების სერიაში იმარჯვეს.
იტალიის ნაკრებთან ხორვატებს ასეთი შედეგი აქვთ - 9 მატჩი, 3 მოგება, 5 ფრე, 1 წაგება. ბოლოს გუნდები ერთმანეთს 2015 წელს შეხვდნენ (1-1).
ხორვატია და ალბანეთი კი ერთმანეთს ევრო 2024-ზე ისტორიაში პირველად დაუპირისპირდებიან.
საინტერესოა, რომ ზლატკო დალიჩი ეროვნულ ნაკრებს 2017 წლიდან წვრთნის, მისი გუნდი კი გულშემატკივრებს თავს ყოველთვის ბრძოლისუნარიანობით ამახსოვრებს. ხორვატები 2018 წლის მსოფლიო ჩემპიონატზე ფინალში დამარცხდნენ, 2022 წელს კი მე-3 ადგილი დაიკავეს.
ასე რომ მუდამ მებრძოლი ხორვატებისგან კვლავ უნდა ველოდოთ დიდ წინააღმდეგობას, მითუმეტეს, როცა ისინი ისეთ ჯგუფში არიან, სადაც მსოფლიო გრანდები ესპანეთი და იტალია ითამაშებენ.
გთავაზობთ სტატიებს სხვა ნაკრებების შესახებაც:
გერმანია
საფრანგეთი
ინგლისი
პორტუგალია
იტალია
ნიდერლანდები
