სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
-
Aa
+
ფონტის ზომა
adjarabetarena აგრძელებს თქვენთვის ევრო 2024-ს მონაწილე გუნდების გაცნობას და დღეს ბელგიის ნაკრების ჯერი დადგა.
ბელგიის ეროვნულ გუნდში ახალი ერა დაიწყო - ცნობილი ოქროს თაობა, რომელმაც საბოლოოდ ვერაფერი ვერ მოიგო, ნელ-ნელა წარსულს ჩაბარდა და იმ პერიოდიდან გუნდში რამდენიმე ვეტერანიღა დარჩა. მთავარი მწვრთნელი რობერტო მარტინესი ევროსთვის უკვე პორტუგალიის ნაკრებს ამზადებს, ბელგიას კი, 2023 წლის თებერვლიდან, იტალიელი დომენიკო ტედესკო უდგას სათავეში.
ედენ აზარმა და ვინსენ კომპანიმ კარიერა დაასრულეს, ტიბო კურტუას ჯერ მწვრთნელთან ჰქონდა კონფლიქტი, როცა მან კაპიტნის სამკლაური მის ნაცვლად ლუკაკუს მისცა, შემდეგ კი მძიმე ტრავმაც მიიღო და წინასწარვე თქვა, რომ ევროზე არ წავიდოდა. შესაბამისად, ბელგიის დღევანდელ განაცხადში რეალის პირველ ნომერს ვერ ამოიკითხავთ.
მთავარი მეკარის გარეშე - ბელგიის განაცხადი ცნობილია
წელიწადსა და ორ თვეში ტედესკომ ბელგიის სათავეში 12 მატჩის ჩატარება მოასწრო და ჯერჯერობით დაუმარცხებელია (8 მოგება, 4 ფრე), გუნდმა 28 გოლი გაიტანა და მხოლოდ 8 გაუშვა. თანაც, მეტოქეებად ინგლისიც ჰყავდა, შვედეთიც და გერმანიაც.
საკვალიფიკაციო ეტაპი ტედესკოს გუნდმა წაუგებლად გაიარა - ჯგუფში ავსტრია, შვედეთი, აზერბაიჯანი და ესტონეთი ჰყავდა და პირველობა 6 მოგებით და 2 ფრით გაინაღდა. მეორე ადგილით ევროზე F ჯგუფიდან ავსტრია გავიდა.
ბოლო დეკადა, ან ცოტათი მეტიც, ბელგია ყველა დიდ ტურნირს ერთ-ერთი მთავარი ფავორიტის სტატუსით ხვდებოდა, თუმცა იმედები ვერცერთხელ ვერ გაამართლა და ყველაზე დიდ მიღწევად 2018 წლის მუნდიალზე მოპოვებული მესამე ადგილი მიიჩნევა. გამონაკლისი არც ევროპის ჩემპიონატებია, სადაც ბელგია წელს მეშვიდედ ითამაშებს.
პირველად ბელგია ევროპის ჩემპიონატზე 1972 წელს წარსდგა და მესამე ადგილი დაიკავა, 1976-ში ვერ მოხვდა, 1980-ში კი ფინალში გერმანიასთან დამარცხდა (1:2), რაც კონტინენტალურ პირველობაზე დღემდე გუნდის საუკეთესო შედეგად რჩება.
1984-ში ბელგია ჯგუფში ჩარჩა და მას შემდეგ სამი ევროპის ჩემპიონატი გამოტოვა. მონაწილეობის მიღება ნაკრებმა მხოლოდ 2000-ში, ერთ-ერთი მასპინძლის სტატუსით შეძლო, თუმცა ვერც საშინაო კედლებმა უშველა და ჯგუფში ჩარჩა.
შემდეგ ისევ სამი გამოტოვებული ევრო იყო - 2004, 2008 და 2012-ში გუნდი ტურნირის მიღმა დარჩა, 2016-ში და 2020-ში კი სტაბილურად მეოთხედფინალამდე მიდიოდა, თუმცა შემდეგი ნაბიჯის გადადგმა ვერცერთხელ ვერ შეძლო.
რომ შევაჯამოთ, ექვს მონაწილეობაში ბელგია ერთხელ მეორე ადგილზე გავიდა, ერთხელ მესამეზე, ორჯერ ჯგუფში ჩარჩა და ორჯერ მეოთხედფინალში შეძლო გასვლა.
ევროპის ჩემპიონატებზე ბელგიის ნაკრების ყველა დროის საუკეთესო ბომბარდირი რომელუ ლუკაკუა (6 გოლით), თანაც დიდი უპირატესობით, სხვა არცერთ ფეხბურთელს კონტინენტალურ პირველობაზე ორი გოლის მეტიც არ აქვს გატანილი - ლუკაკუმ ორი გოლი 2016-ში გაიტანა და 4 - 2020-ში.
ოქროს თაობისგან განსხვავებით, ბელგიის ნაკრების დღევანდელ შემადგენლობაში ბევრ ე.წ. ნოუნეიმს შეხვდებით - ყველანაირი პატივისცემის მიუხედავად, დღევანდელი განაცხადი ახლოსაც ვერ მიდის იმ ვარსკვლავთცვენასთან, რომელიც გუნდს წინა წლებში ჰქონდა. იქნებ, ნაკლები ვარსკვლავითა და მეტი გუნდურობით, ტედესკო ამ ნაკრებისგან მეტსაც გამოაცხობს, ვინ იცის...
ბელგიის ნაკრების დღევანდელი ჯამური ღირებულება 586 მილიონ ევროს შეადგენს, მისი ყველაზე ძვირადღირებული ფეხბურთელი ჯერემი დოკუა (მან სიტი) - 65 მილიონი ევრო. მეორე ადგილზე ლაიფციგის სტრაიკერი ლუის ოპენდაა (60 მილიონი ევრო). მთავარი ვარსკვლავი კევინ დე ბრუინი კი მე-3 ადგილს 50 მილიონიანი ღირებულებით იყავებს, რისი პირველი მიზეზიც სიტის ლიდერის ხშირი ტრავმიანობა და ასაკია (32).
დღევანდელი ნაკრების ყველაზე გამოცდილი ფეხბურთელი იან ვერტონგენია (154 მატჩი), მეორე ადგილზე აქსელ ვიტსელია (130 მატჩი), რომელუ ლუკაკუს ნაკრების მაისურით 114 თამაში დაუგროვდა, კევინ დე ბრუინს კი ასეულთა რიგებში გაწევრიანებამდე ერთი მატჩი აშორებს (99).
ბელგიელთა დღევანდელი ნაკრებისაც და ზოგადად ისტორიაშიც საუკეთესო ბომბარდირი ლუკაკუა, რომელმაც 114 მატჩში წარმოუდგენელი 83 გოლის გატანა მოახერხა. კევინ დე ბრუინი 26 გოლით მეორე ადგილზეა, შემდეგ კი დიდი უფსკრულია - მესამე ადგილს აქსელ ვიტსელი 12 გოლით იკავებს.
ევროპის ჩემპიონატზე ბელგიის ნაკრები ჯგუფში სლოვაკეთს (17 ივნისს), რუმინეთს (22) და უკრაინას (26) დაუპირისპირდება.
სლოვაკეთთან ბელგიას 3 მატჩი აქვს ჩატარებული - 1 მოგება, 2 ფრე
რუმინეთს ბელგიელები 12-ჯერ დაუპირისპირდნენ - 5 მოგება, 2 ფრე, 5 მარცხი
უკრაინასთან დაპირისპირების ისტორიის ფურცელი კი ბელგიას ცარიელი აქვს - გუნდები ერთმანეთს ისტორიაში პირველად გადაეკვეთებიან.
გთავაზობთ სტატიებს სხვა ნაკრებების შესახებაც:
ნ
ნიკა შაქარაშვილი
კომენტარები