adjarabetarena-ზე გრძელდება ევროპის ჩემპიონატის მონაწილე გუნდების გაცნობა. საქართველოს ნაკრების მეტოქეების პორტუგალიისა და თურქეთის ნაკრებების შემდეგ ჩეხეთის ჯერიც დადგა.
ჩეხეთის ნაკრები საკვალიფიკაციო ეტაპზე ჯგუფში ალბანეთის, პოლონეთის, მოლდოვასა და ფარერების კუნძულების ნაკრებებთან ერთად მოხვდა.
გუნდმა ალბანეთის მსგავსად 15 ქულა დააგროვა და მე-2 ადგილზე გავიდა, რითიც ევრო 2024-ზე კვალიფიკაცია მოახერხა. ჩეხებმა 4 მატჩი მოიგეს, 3 ფრედ ითამაშეს და ერთადერთი მატჩი ალბანეთთან წააგეს. მათ 12 გოლი გაიტანეს და 6 გაუშვეს.
ჩეხებმა მარტში 2 ამხანაგური მატჩი ჩაატარეს და ორივე მოიგეს - ნორვეგიასთან (1-2_ და სომხეთთან (2-1).
მთავარმა მწვრთნელმა ევროპის ჩემპიონატის წინ უკვე დაასახელა 26-კაციანი განაცხადი.
შემადგენლობის ჯამური ღირებულება Transfermarkt-ის მიხედვით 175 მილიონი ევროა, ყველაზე ძვირადღირებული მოთამაშეები კი კაპიტანი ტომას სოუჩეკი (30 მილიონი ევრო), პატრიკ შიკი (22 მილიონი ევრო) და ადამ ჰლოზეკი (12 მილიონი ევრო) არიან. სოუჩეკი ვესტ ჰემის ფეხბურთელია, შიკი და ჰლოზეკი კი ლევერკუზენში ასპარეზობენ.
არსებულ განაცხადში ყველაზე გამოცდილები ვესტ ჰემის ფეხბურთელები სოუჩეკი (68 მატჩი) და ვლადიმირ ცოუფალი (40 მატჩი) არიან, ფიორენტინას შემტევ ანტონინ ბარაკს კი 39 მატჩი აქვს ჩატარებული ნაკრებში.
მოქმედი ბომბარდირებში კი კვლავ ზემოთ ჩამოთვლილი მოთამაშეები ფიგურირებენ - შიკი (18 გოლი), სოუჩეკი (12 გოლი) და ბარაკი (8 გოლი).
ჩეხეთი როგორც დამოუკიდებელი ქვეყანა ევროპის ჩემპიონატებზე 1996 წლიდან გამოდის, გუნდმა მას შემდეგ ყველა ევროზე მიიღო მონაწილეობა და საუკეთესო შედეგი სწორედ 1996 წელს დააფიქსირა - ჩეხები ფინალში გერმანიასთან დამარცხდნენ და ვერცლის მედალს დაეუფლნენ. ევრო 2020-ზე გუნდმა 1/4 ფინალში გააღწია, სადაც დანიას ვეღარ აჯობა.
რა თქმა უნდა, აღსანიშნავია ჩეხოსლოვაკიური ფეხბურთის მთავარი წარმატებაც, 1976 წელს ჩეხოსლოვაკიის ნაკრები ევროპის ჩემპიონი გახდა, 1960 და 1980 წლებში კი გუნდმა მე-3 ადგილი დაიკავა.
ჩეხების საუკეთესო ბომბარდირები ევროპის ჩემპიონატებზე მილან ბაროში და პატრიკ შიკი არიან 5-5 გოლებით. შიკს შანსი აქვს მომავალ ტურნირზე ამ სიაში ერთპიროვნულად დაწინაურდეს.
ევრო 2024-ზე კი ჰაშეკის გუნდი საქართველოს ნაკრების ჯგუფში იქნება პორტუგალიისა და თურქეთის ნაკრებებთან ერთად. ჩვენი გუნდი ჩეხებს 22 ივნისს ჰამბურგში დაუპირისპირდება. ეს ურთიერთდაპირისპირება ისტორიაში პირველად შედგება.
.png?auto=webp&format=pjpg&width=3840&quality=60)
დანარჩენ ორ მეტოქესთან კი ჩეხებს წარსული გამოცდილება აქვთ.
პორტუგალიასთან სტატისტიკა ასეთია - 5 მატჩი, 1 მოგება, 4 წაგება. ბოლო მატჩი 2022 წლის სექტემბერში შედგა, სადაც პორტუგალიელებმა 0-4 იმარჯვეს.
თურქებთან კი ჩეხებს შემდეგი შედეგი აქვთ - 11 მატჩი, 5 მოგება, 1 ფრე, 5 წაგება - ბოლო შეხვედრა 2022 წლის ნოემბერში გაიმართა, სადაც თურქეთმა 2-1 მოიგო.
ჩეხეთის ნაკრები ევრო 2024-ზე ძალიან საინტერესო გუნდი იქნება. მათთვის სახასიათო ფიზიკური და ორგანიზებული თამაშია, შესაბამისად ქართველებს ადვილი თამაში არ ელოდებათ, თუმცა უპირობო ფავორიტები ჩეხები ჩვენთან შეხვედრაში არ იქნებიან.
გთავაზობთ სტატიებს სხვა ნაკრებების შესახებაც:
გერმანია
საფრანგეთი
ინგლისი
პორტუგალია
იტალია
ნიდერლანდები
ხორვატია
ესპანეთი
თურქეთი
ბელგია
